Guwahati, Nailar19 :U Controller of Examinations ka Gauhati University, u Dr Dhruwajyoti Choudhury ula shah sospon noh namar ki katto katne ki jingbym biang bad namar ka jingpynslem ban pynbna ia ka result jong ki khynnah pule Undergraduate.
Kane ka hukum ba la pynmih da u Registrar bad ki bor ba dei khmih ka la ong, “u Dr Dhruwajyoti Choudhury, Controller of Examinations, Gauhati University u la shah sospon noh mardor tad haduh ban da pynmih hukum da kumwei pat namar ki jingbym biang bad namar ka jingpynslem ban pynbna ia ka result ki khynnah Undergraduate jong ka Gauhati University mynta ka snem 2022.”
La pynsangeh kam ia u hapoh ki kyndon Rule 6 jong ka Assam Services (Discipline & Appeal) Rules, 1964, ong katei ka hukum.
Ki khubor ki iathuh shuh shuh ba hadien ka jingpynsangeh kam ia u Choudhury, u deputy controller ula shah pynkhamti ban shimti ia katei ka bynta.
Lah ban kdew ba ki khynnah pule ki la kynnoh ba namar ka jingpynslem ia ka result, kiba bun na ki kim shym la lah shuh ban pynkhreh ia ki jingpule kiba kham shalor ha kiwei pat ki jylla lane hapoh kane hi ka University.
