Nongstoin, Nailar 19: Kawei ka par dewiong ha West Khasi Hills District, kala twa hynnin ka miet ha kaba uwei na ki nongtih par ula iap hajuh bad uwei pat ula mynsaw jur.
Kane ka jingjia kala jia ha ka par dewiong kaba don ha ka shnong Goreng (Urak) kaba hap hapoh ka Shallang Police Station, West Khasi Hills.
Kat kum ka khubor ba ioh, kane ka jingtwa kala jia hynnin ka miet bad arngut na ki nongtih tih par kila shah taplup ha kane ka jingtwa.
Kine ki arnut ki kyrteng u Lependro Sangma ba 34 snem bad u Hendid Momin ba 33 snem, kiba dei na ka shnong Uguri, (Goraimari) kaba hap hapoh ka Kharkutta Police Station.
U Lependro Sangma u dei u ba iap ha kane ka jingtwa ka par katba u Hendid ula mynsaw jur.
Haba pynthikna ia kane ka jingjia, U Superintendent of Police ka West Khasi Hills Bah HG Lyngdoh ula pyntip ba ula phah ia ka kynhun ki Pulit Ophisar sha kane ka jaka ban pynlong ia ka jingtohkit halor kane ka jingjia.
“Kane ka par ka dei kaba don sha kyndong bha bad kaba hap ban iaid da ka kjat katto katne kynta namar ka surok ruh ka long kaba sniew bha” ula ong.
