Shillong, Nailur 26 : U MP ba marwei ka Rajya Sabha na Jylla Dr WR Kharlukhi, ha ka sngi Palei, ula dawa ia ka jingtohkit kaba laitluid halor ki jingkynnoh treikam bym hok hapoh ka Meghalaya Public Service Commission (MPSC) haba pynbna ruh ba u kloi ban iehnoh ia ka kam MP lada shem ba i kurim i donkti lang.
Ha ka shithi bala phah sha u Myntri Rangbah ka Jylla Conrad K Sangma, u Dr Kharlukhi ula ong “Nga kwah ban pyntip sha phi ba dang shen, kala mih ha ki khubor halor ki jingtreikam bym hok hapoh ka MPSC”.
“I Kong Corina Lyngdoh, iba dei iwei naki dkhot hapoh ka Commission, i dei i kurim jong nga bad kane kala pynthohbriew ia ka iing ka sem jong nga. Khnang ban aishai baroh, nga kyrpad ia ka Sorkar ba kan thung da ka jingtohkit ba laitluid halor kane ka kam”.
Ula kyrpad ruh ba kane ka jingtohkit ka dei ban dep hapoh ka shibnai.
Haba iakrren bad ki lad pathai khubor, u Dr Kharlukhi ula ong “Nga bad I Kurim ngi la iakren halor kane bad ila ong ba lada ki shem ba ila leh bakla, I kloi iba kloi ban leit sha along. Nalor kane, lada ka jingtohkit ka lap ba I kurim jong nga I donkti, tang shisngi hi ngan iehnoh ia ka kam MP khnang ba kin tip nga dei u briew uba kumno”.
Ula pynpaw ba ka jingdawa ban tohkit ka long eh ban pynthikna ba kiei kiei baroh ki dei ban long halor ki jingshisha ym tang ki jingiakren shane shatai.
“Ka don ka hukum ka Iingkashari Supreme Court hakaba 87.5% ka dei ka written bad 12.5 % ka dei ka personal bad ym tang kata, balei kane ka hukum ka mih?, ka mih namar ba don ki jingleh bym hok hapoh ka Assam Public Service Commission (APSC) bad hadien ba tohkit da ki katto katne ki tnad, la shem ba ka don ka jingshisha bad haduh mynta, u Chairman ka APSC u dang don ha along” ong u Dr Kharlukhi.
“Ym don satia ki Commission hapoh ka Ri India kiba nud ban iaid pyrshah ia kane ka rai jong ka Supreme Court” ula ong haba kyntu ia ki lad pathai khubor ruh ban tohkit ha ka jaka ban shu pynmih ia ki khubor tang na ki jingkren ki briew.
Nalor kane, u Dr Kharlukhi ula ong ba ki briew kila pynmih ia ki jingkynnoh bamsap bad bunsien ki jingkynnoh ki iaid sha ka NPP. “Hynrei nga shem ba kane hi ka dei tang ka kam politics. Lada phi nud (wad ia ka jingshisha)” ula ong.
Ula kdew ruh ia ka jingjia ba dang shen halor ka jingkynnoh jong u President ka Congress Vincent H Pala pyrshah ia u Symbud Myntri Rangbah Bah Sniawbhalang Dhar, uba la ai da ka legal notice ba T.100 klur.
“Phi iohi kaei kaba u Bah Pala u leh? U kren halor u droks bad sei ia ka kyrteng u Symbud Myntri Rangbah. Lada u Bah Pala u bakla, un sa duk da T.100 klur hynrei lada ki jingkynnoh ki dei kiba shisha, u Symbud Myntri Rangbah un poi shong along. Ka dei ban long kumne. Wat shu kyllum lang ia baroh. Phi wad ia ki briew ba donkti bad kdew beit beit ia ki” ula ong.
 haba pynbna ruh ba u kloi ban iehnoh ia ka kam MP lada shem ba i kurim i donkti lang.){kind=link}