Shillong, Nailur 26 : Ka Khasi Hills Autonomous District Council (KHADC) ha ka sngi Palei, kala kyrpad ia u Lat ka Jylla ban pynkloi ha kaban ai jingmynjur noh ia ki 7 tylli ki Bill ba sahteng, kiba la mynjur da ka Iingdorbar ka Council ha u snem bala lah.
Haba iakren bad ki lad pathai khubor hadien ka jingiakynduh ia u Lat ka Raj Bhavan, u CEM ka KHADC Bah Pyniaid Sing Syiem ula ong “Napdeng kine, artylli ki dei ki Bill kiba donkam bha. Kine ki kynthup ia ka KHAD (Administration of Elaka) Amendment Bill, 2023 kaban aibor bad jingithuh ia ka jingtreikam ki seng Samla bad Seng Longkmie ha ki Shnong. Kawei pat ka dei ka KHAD (Khasi Social Custom of Lineage) Amendment Bill 2023 ban register bad pynbeit ia ka rukom pyniaid ia ki seng Kur (Clan administration) hapoh ka thain” ula ong.
Ula ong “Kat kum ka jingwad bniah, ki don palat 3000 tylli ki seng kur ha Ri-lum Khasi hynrei haduh mynta ym pat shym la ithuh satia ia ki da ka ain. Kat kumkane ka bill, ka dei ban don ia uwei u Nong ialam Kur ban ithuh da ka KHADC”.
“U Lat ula kular ban sa ai noh mar mar ia ki jingmynjur khamtam ia kine ki artylli ki Bills ba kongsan” ula bynrap.
U CEM ula iathuh ruh “Ngi la kyrpad ia u Lat ban ai jingmynjur ia ka KHAD(Regulation and Administration of Land) Rules, 2023. Ngi la mynjur ia ka Land Act ha u 2021. Ngi donkam ia ki Rules ban lah pyntreikam pura ia ka Land Act ban register bad iada ia ki khyndew ki shyiap”.
Kiwei pat ki Bill ba sahteng ki kynthup ia ka KHAD (Regulation and Administration of Land) Amendment Bill, 2024, KHAD (Fisheries Amendment) Bill, 2023, Regulation of Trading by Non-Tribal Amendment Rules, 2023 bad ka KHAD (Autonomous Districts Nomination and Election of Lyngdoh and Myntri, Lyngdoh Raid and Sordar Shnong Administration of Sohiong Lyngdohship) 2023.
