Shillong, Nailur 25 : U Myntri Rangbah ka Jylla Conrad K Sangma ha ka sngi Balang, ula ong ba ka rai la ban ai jingbit ne em ban pynlong ia kino kino ki rally ka dei kaba shim da ki bor District ym ha ka kyrdan jong u Myntri Rangbah.
Haba jubab ia ka jingkylli halor ka jingpyrshah ia ka rally khang bam doh masi ha Shillong, u Conrad ula ong “Wat ka NPP haba ngi kwah ban pynlong rally, ngi hap ban aplai sha u DC bad hateng u DC um ai jingbit wat ia ka NPP ban pynlong rally”.
“Namar kata, kane ka rai ka shong eh ha ki bor District, kam dei ha ka kyrdan u Myntri Rangbah, wat lada u Myntri Rangbah u kwah ban pynlong rally na ka bynta ka party lajong, ngam shym la ioh jingbit hateng hateng na ki DC” ula ong ia kane haba pynkynmaw ia u Commissioner & Secretary Sanjay Goyal, ha ka por ba u long SDO ka Ampati, uba khlem ailad ia ka party ban pynlong rally ha u 2008.
Haba pynpaw ba kam don satia kano kano ka jingmushlia jong ka Sorkar halor kane, u Conrad ula ong “Ngi long shai bha ia kane. Ki jingbit ki dei kiba ai da ki kyrdan Deputy Commissioner bad ka shong ha ki DC ban rai la kin ai ne em haba pynshong nongrim ia ki jinglong jingman bad kiwei kiwei ki kam”.
Haba kylli, u Myntri Rangbah ula ong ba ka jingkylli kam mih satia ha ka ban khang iano iano ban leh eiei ha ka rukom iabam iadih bad ia ki kam ba ki jied namar ka India ka dei ka Ri kaba laitluid.
