Shillong, Nailar 18 : Ka jylla Meghalaya kadei kawei na ki jylla kaba kiew stet bha ha ka jingpyntreikam iaka skhim MGNREGA kaba ju tip kum ka skhim 100 sngi lada nujor tang naduh u snem 2015 – 16 haduh u 2021-22.
Katkum ka jingiathuh da u Myntri ka tnad Community and Rural Development Bah Hamletson Dohling, ha u snem 2015-16 ka jingpynlut jong ka sorkar na ka bynta katei ka skhim ka poi 350 klur tyngka.
” Hynrei mynta pat ka la poi haduh jan saw shah namar ka la poi haduh 1700 klur tyngka” ula ong.
Haba iaroh ba katei baroh ka urlong na ka jingtrei borbah ki ophisar ha ki Block Development Office kiba don ha ka jylla, u Myntri u ong ruh ba katei ka skhim ym tang ba ka plie lad ha ka aikam aijam hynrei ka wanrah ruh ia ka roi ka par ha ki shnong ki thaw.
Kawei pat ka bynta kaba u Myntri u kdew ka long ba lyngba ka jingdon jong ka Block ki la mih shibun ki kynhun naduh ki Village Organisation, nangta ki SHG bad kiwei kiwei ha ki shnong ki thaw.
“Ha u snem 2016 ka jingdon ki SHG ha baroh kawei ka jylla ka long kumba 6000 tylli hynrei mynta pat ki la don haduh palat ia ka 45000 tylli” ula ong.
U Bah Hamlet ula ong ruh ba kane ka jingnang bun ki SHG ha ka jylla kadei namar ka jingtrei borbah ki ophisar bad ruh ki nongsynshar shnong kiba pynshlur ia ki nongshongshnong ban mih shakhmat ha kaban pyntreikam ia ki skhim ka sorkar.
