Shimkhia ka Tnad Food Civil Supply ban tem ia jingbuhrieh mar ki mahajon bad jingdie black
Shillong, Nailur 13 : Haba shimkhia ia ka jingkyrkieh jong ka kam, ka Tnad Food & Civil Supplies & Consumers Affairs, kala shim ia ki kattp katne ki sienjam ban tehlakam ia ka dor ka mur jong ki mar ki mata bad pynthikna ia ka jingdon jong ki mar na ka bynta ki nongshongshnong baroh. Ka sienjam ba kongsan bala shim halor kane ka bynta, ka dei ka jingpyntreikam ia ka Price Monitoring System (PMS).
“Ka PMC kala don ha manla ki district, k alum bad pynphriang ia ki dor die lang bad dor khuta jong ki 22 tylli ki marbam mardih ban iada ia ka jingmyntoi ki nongthied nongpeot bad ban pynthikna ba kine ki marbam kin dang long kiba lah ban thied da ki paidbah” ong ka kyrwoh na ka Tnad bala pyllait hynne ka sngi Thohdieng.
Ka la ong ba ha ka jingpyrshang ban pynbha ia ka jingai jingkhein ia ki dor ki mur jong ki mar ki mata ba manla ka sngi, ka Sorkar India kala pynbun ia ka jingdon ki mar bala buddien kaba long na ka 22 sha ka 38 tylli, kaba la treikam naduh ka 1 tarik Nailar, 2024.
Kane ka jingpyn iar ka kynthup ia 16 tylli ki marbam bala bynrap lang, kaba pyniahap lang bad kito ki mar bala buh thup hapoh ka Consumer Food Price Index (CFPI) jong ka Consumer Prince Index (CPI) ka Ministry of Statistic & Programme Implementation.
“Ka Shillong, Tura, Jowai, Sohra, Mairang, Nongpoh, Khliehriat, Nongstoin, Mawkyrwat, bad Williamnagar kila rung ha ka Price Monitoring System (PMS) applicaton, ban pynthikna ba ki dor jong ki mar ki mata kim dei ban palat ia ka dor bala buh ha ka ri India baroh kawei” ong ka tnad.
“Ban iada shuh shuh ia ki jingmyntoi jong ki nongthied nongpet, ka Tnad ka la pynkhlain ia ka ki rukom peit bniah da kaba pynkha ia ar tylli ki kyrdan jong ki Price Monitoring Committee kiba kynthup ia ka State Level Price Monitoring Committee bad ka District/Sub Divisional Vigilance & Monitoring Committee. Ia kine ki komiti la buh ba kin peit bniah ia ka dor ka mur ki mar ki mata, ka kit ka rong bad ka jingleit jurip man ka por ban khanglad ia ka jingbuhrieh mar, jingdie black bad ka jingpynkiew dor beain ia ki marbam” kala ong.
Ka Tnad ka la buh ruh ia ka Price Monitoring Syste (PMS) Dashboard, kaba buh ia ka dor jong ki marbam ba kongsan man ka sngi ha kylleng ki District bad ki Sub Division. Kane ka MIS Dashboard ka dei ka atiar kaba kongsan ban pynlah ha ka ban shim ia ki rai ba kongsan da ki heh jong ka tnad. Ia ka Retail Price MIS jong ki dor marbam jong ka jylla Meghalaya lah ban ioh na ka ka website jong ka tnad https://megfcsca.gov.in.
Nalor kane, ka kyrwoh ka la ong, ka kamram ba hakhmat eh jong ka tnad Food & Civil Supply ka long ban pynthikna ba ki mar ba kongsan kin dang long kiba lah ban thied da ki paidbah ka Meghalaya.
“Ka Tnad ka shimkhia ban khanglad ia ka jingbuhrieh ia ki mar, ka jingdie black, bad ka jingpynkiew dor thok, bad ban pynthikna ia ka jingdon jong ki mar ba kongsan ha ki iew paidbah. Kum u Myntri uba sngewkhia, nga pynthikna ïa ki paidbah ka Jylla Meghalaya ba ngin dang bteng ban trei shitom ha ka ban pyntreikam hok ia ki ain bad ki polisi, ban pynthikna ia ka bha ka miat jong baroh ki nongshong shnong,” ka la bynrap.
Ha kawei pat ka liang, ka tnad ka la ong ba ki don bun ki daw ki la pynlong ïa ka jingkylla ki dor jong ki marbam mar dih ha Jylla , khamtam ha ki marbam ba kongsan ki mar kum u khaw, ki shana bad ki jhur.
Ka jingbym thikna bad jingwan snem u spah lyiur bala mad ha kylleng ki bynta jong ka Ri, kala lam sha ka jingtyrkhong, kaba ktah ia ka jingpynmih ia ki khaw bad jhur. Ha kiwei ki thain ka Ri, ka jingther u slap kala lam sha ka jingshlei um ba shyrkhei bad pynjulor lut ia ki jingthung jingtep bad nang pynduna shuh shuh ia ka jingkhaii.
Nalor kata, da ka jingbun briew jong ka India kaba palat ia ka shi billion, ka jingpynbiang bunsien ka hap iaksaid ban lah pynbiang ia ka jingdawa, kaba ialam sha ka jingkiew dor. Ka jinglong jong ki jaka ha Jylla bad ka suin bneng kila nang tynrong ia ka jingbym lah pynbiang tarajur ia ka jingpynbiang marbam bad ka jingdawa. Ka jingheh ka dor bai bylla bad ka bai kali kala nang pynkhia shuh shuh ia ka jinglong jingman.
Ka jaka lum jong ka Meghalaya ka nang pynkiew ia ka jinglut jingsep ha ka leit ka wan, kaba hadien ka poi sha ki nongthied nongpet. Ka jingshaniah jong ka jylla ha ka jingwanrah ïa ki katto katne ki mar na shabar ruh ka la pynsniew ia ka jinglong jingman, namar ka jingkylla ka iew ka hat sha kiwei ki jaka, kala ktah ia ka dor hangne.
.){kind=link}