Shillong, Nailur 13 : Ka Hynniewtrep Youth Council (HYC) ha ka sngi Thohdieng, kala dawa ia ka Sorkar Jylla ba kam dei ban shah pynlong ia ka Gau Pratishtha Andolan “ Gau Dhwaj Sthapana Bharat Yatra ha Shillong, kaba la buh ban long ha ka 2 tarik Risaw.
“Na ka bynta ka jingsuk jingsain, la kyntu ia ka Sorkar jong ka Jylla ba kan ym shah ia ka ‘Yatra’ lane ka prokram ban wan rung sha Jylla jong ngi bad ban pynlong ha kane ka sngi kumba la pynbna da ki nongpyniaid” ong u President ka HYC Roy Kupar Synrem ha ka dorkhas bala phah sha u Myntri Rangbah ka Jylla Conrad K Sangma.
Ula ong ba ka jingbam doh masi ka dei shibynta jong ka jingim kiba bun ki nongshongshnong ka Jylla Meghalaya nalor ka dei ka lad kamai kajuh ia ki hajar ngut ki briew kiba don bynta ha ki kam shalan bad jingdie ia ka doh hapoh ka Jylla.
“Haba, ngi ngim ju pynbor ia kiwei ia kaei kaba ki dei ban bam bad kaei ka ba kim dei ban bam, ngi pyrshah iano iano ne kino kino ki bor ne kynhun kiba pynbor ia ka rukom bam ne ka rukom ngeit jong ngi” ula ong haba bynrap “Nalor kane “Ka Kmie” ka dei kaba niewkor bha ha ka imlang sahlang jong ngi ki paid Hynniewtrep bad ban nujor ia ki bad ka “masi’ lane ‘ksew’ ka dei ka kam sang ha ka imlang sahlang jong ngi. Kumta, ngi pyrshah jur ia ka jingiakhih iaksar ne ka jingthmu jong kano kano ka kynhun ban bthah ia ngi ban gin khein ia ka ‘masi’ kum ki ‘kmie’ jong ngi”.
“Kane ka yatra ka dei kaba la pynlong ban dawa ia ka Sorkar India ba kan khang noh ia ka jingpyniap ia ki masi bad jingbam doh masi ha India bad ban pynbna ia ka ‘masi’ kum ka “kmie ka Ri’ kam dei kaei kaei ruh hynei ka dei ka jingpyrshang ban kynshoit ia ka jingsngew iapher hapdeng ki jaidbynriew bapher bapher bad ki niam bapher bapher ha ka Jylla jong ngi, kiba ju ia imsuk im sain kat haduh mynta” ula bynrap.
