Dimapur, Nailar 18 :Ka sorkar Nagaland ka la maham tyngeh halor ka jingkhot pynlong ia ki jingiakhih ki ba pynkhein ia ki kyndon ain lane ki ba wanrah ka kynrum kynram bad pynthut ia ka suk ka sain bad ia ka leit ka wan jong ki riew paidbah.
Ka sorkar Nagaland ka la ong ba ki bor pyniaid district ki la shah pynkup bor lyngba ka ain ban leh da ka ba tyngeh pyrshah ia ki ba pynkhein ain.
Ha ka jingpynbna ba la pyllait paidbah ha ka sngi ba Ar ba la lah, u home commissioner ka Nagaland, u Abhijit Sinha u la ong ba kino kino ki jingeh ki ba lam sha kino kino ki jingiakhih dei ban aijingtip lyngba ki bor sorkar ba dei khmih khnang ban lah ban leh ia ka ba donkam baroh.
Kino kino ki jingialum paidbah ki ba thmu ban pynpaw ia ki jingsngew lane ki jingeh bad kiwei pat khlem da ioh jingtip na ki bor ba dei khmih jong ki district ki long ki ba beain, ong utei u heh sorkar.
Katei ka jingpynbna ka la ong ruh ba ki katto katne ki riew shimet, ki kynhun seng ki ba khot pynlong ia kino kino ki jait jingiakhih ki ba lam sha ka jingkhang ia ki surok highway bad ki surok paidbah ha ka jylla ban banbor halor ki jingdawa ki jong ki, ki long ki ba beain.
Ka la ong ruh kino kino kiba don bynta ha kaba khang ia ki surok highway bad ki surok paidbah kin ngat ha ka jingshah pynshitom hapoh ki kyndon ain jong ka National Highway Act 1956, the Prevention of Damage to Public Property Act 1984 bad ka Indian Penal Code.
Shuh shuh katei ka jingpynbna ka la ong ruh ha ki ba bun na ki jingshim bishar jong ka iingbishar Supreme Court bad ki high court la ong ba ka jingkhot pakhang shnong bad pakhang surok ka long ka ba beain bad ka ba long pyrshah ia ki riti synshar khadar jong ka ri, bad ba ki nong khot pynlong kin ngat ha ka jingshah tian bishar.
Ka sorkar Nagaland ka la ong ruh ba ha ki katto katne ki khep, shi bynta jong ka jingiakhih na ka bynta ban banbor halor ki jingdawa, ki la don ki jingkhot ban pynthut ia ki jingrakhe ha ki sngi ba kyrpang jong ka ri lane ka jingkhang jubor ia ki paidbah ba kin leit iashim bynta ha ki ba kum kine ki jingialang.
“Kano kano ka jingpyndonkam bor na ka bynta ban pynthut ia ki jingrakhe ha ki sngi ba kongsan jong ka ri ki long ki ba beain bad ki dei ki kam pyntriem ba shyrkhei, abd kito ki ba donkti kin ngat ha ka jingshah pynshitom ha ki kyndon ain bapher bapher,” ong shuh shuh ka jingpynbna.
Na ka liang ka sorkar Nagaland ka la kyntu ruh ia ki bor district bad ki bor pulit ba kin bishar bniah ha ka ba iadei abd ki kynhun seng ne kiwei pat ki kynhun ki ba ki jingdawa jong ki, ki dang sahteng bad ki ba la khot pynlong jingiakhih.
