Shillong, Nailur 11 : Ka National People’s Youth Front (NPYF) ka la kitbok kitrwiang ia u State President ka NPP bad Symbud Myntri Rangbah ka Jylla Bah Prestone Tynsong ba un ioh noh ia ka jingkoit bad ban nang iohbor bad nang khlain noh.
“U Bah Prestone ula kham iohbor hadien ba ula ioh ia ka jingsumar. Ki Nongialam ka NPP baroh ki kitbok ba un ioh noh ia ka jingkoit jingkhiah kaba pura” ong u Bah Kitborlang Nongrem, President ka NPYF.
Lah ban kdew hangne, u Bah Prestone ula poi thiah hospital ha ka sngi Nyngkong hapoh ka Nazareth Hospital hadien ka jingkiew kysan ka Blood Pressure.
Hadien ba ula nang iohbor bad nang hiar ka BP, ia u Bah Prestone la pynkynriah noh hynne ka sngi Balang sha Delhi ba un ioh ia ki jingsumar ba kham paka na ki hospital ba pawnam jong kane ka Nongbah ka Ri.
Ha kawei ka liang, u Bah Kitborlang ula pynpaw ia ka jingsngewsih halor ki jingkynthoh khlem akor ba palat pud hapoh ki jaka kynthoh (comments section) jong ki social media, kaba ktah ia ki bahaiing hasem bad ka longbriew man briew.
“Wat u nongshun ruh un tip bad don ka jingsngew bad um tim satia ia uba pang ba shitom” ula kynthoh.
