Shillong, Nailar 18: Ka sorkar ka la pynkhreh mynta ban sam noh sa bad ki pylleng phon hapoh ka Supplementary Nutrition Programme (SNP) ha ki 250 tylli ki Model Anganwadi Centers (AWC’s), kiba la khmih lynti ba ki lah ban ai ka jingmyntoi ia kumba 13,000 ngut kiba dei ban ioh ia kine ki jingbam tei met ha ka kylla kaba nyngkong.
Kane ka jingsam kan dei shi bynta na ki jingbam ba la shet ba ju pynbiang da ka ICDS sha ki khynnah kiba don ha ka rta 3 haduh 6 snem, nangta ia ki longkmie armet bad ruh ia ki longkmie ba dang au buin khun ha baroh 46 tylli ki block kiba don ha ka jylla.
Na ka liang ka Meghalaya Early Childhood Development Mission (MECDM), ryngkat ka jingiatreilang bad ka tnad Social Welfare bad ruh bad ka Meghalaya State Rural Livelihood Society (MSRLS) ki la pyntyllun ia kane ka jingsam pylleng phon na ka bynta lai bnai kaban sdang naduh ka 15tarik Nailar haduh ka 15tarik u Naiwieng.
“Ka jingsam ia ki pylleng ka la sdang ha baroh ki distrik jong ki 250 tylli ki Anganwadi Centre lyngba ki 150 tylli ki SHG bad 26 tylli ki VO kiba la kyntiew hapoh ka NRLM ban pyntyllun ia ka kam, ong ka kyrwoh khubor.
La ong ruh ba kin don haduh 10732 ngut ki khynnah bad 2924 ngut ki longkmie armet bad ki longkmie lungkhun kiban myntoi na kane ka sien pyrshang.
Ka jingpyrshang ban sam noh da ki pylleng kadei halor ka nongrim ba kadei ka jingbam ba bun ka protein, iron, vitamin A, D, E bad K, Choline bad Omega 3 fatty acids kaban iarap wat ban pynproh ia ka jabieng khamtam eh ia ki khynnah.
Kane kadei ruh ka sien kaba nyngkong ba ka jingsam ia ki pylleng phon yn sdang lyngba ka Meghalaya ECD Mission da ka jingiatrei lang bad ka Social Welfare, kaban pyntreikam pat ha baroh ki AWC bad ki shnong ki bym pat shah kynthup ha katei ka kylla kaban treikam ryngkat ryngkat ki kyndon jong ka Asian Development Bank Procurement Guidelines hapoh ka Meghalaya ECD Mission.
Lah ban kdew hangne ba ka MECDM kadei ka mission kaba buh thong ban peit na ka bynta ka jingkoit jingkhiah, nangta ka bam ka dih kaba tei na ka bynta kito kiba dang khie dang san khamtam eh ki khunlung khynnah ha Meghalaya.
Kane ka mission ka iar ha ki 1554 tylli ki shnong kiba khlem pat kynthup hapoh ka ICDS Programme da kaba trei lang pat bad ka tnad Health, Social Welfare, Education, Community & Rural Development jong ka sorkar jylla.
