Shillong, Nailur 10: U MP Lok-Sabha ka Congress na Tura Saleng A Sangma, ha ka sngi nyngkong ula leit jurip ia ka North Eastern Indira Gandhi Regional Institute of Health and Medical Sciences (NEIGRIHMS) hadien ba ula shah thung dang shen kum u dkhot jong ka Governing Council.
U Saleng Sangma ula lum ruh ia ka jingialang ha kaba ula ioh ia ka jingbatai shaphang ka jinglong jingman jongka NEIGRIHMS. Ka jingiakren kala long kaba seisoh bad ula ioh ruh ban iakren bad ki doctor bad ki nongtrei na ki tnad bapher bapher jongka NEIGRIHMS.
Haba ai jingkren, u MP ula pynpaw ia ka jingkmen ban jurip ia ka NEIGRIHMS bad ka jingthmu jong ka jingjurip ka long ban un ioh ia ka jongsngewthuh kaba shai kdar halor ki mat bapher bapher kiba ktah ia ka NEIGRIHMS. Dei lyngba kane, ngan ioh ban rah ia ki mat sha ka sorkar pdeng ban pynthikna ba ka NEIGRIHMS kan kylla long kum ka jaka ai jingsumar kaba paka kaba don ha ka kyrdan kaba hajrong ban ai jingshakri ia ki paidbah ka thain Shatei Lam Mihngi baroh kawei.
U Director ka NEIGRIHMS u Prof Nalin Mehta ula pynpaw ha u MP halor ki mat kiba kongsan jong ka jingshakri ka NEIGRIHMS kaba kynthup ia ka jingduna ha ka jingdon ki doctor, ka jingsahteng kaba la slem ha kaban khmih bniah ia ki Cadre, ban rah ia ka kyrdan kaba ia ryngkat bad ka AIIMS New Delhi bad PGIMER, Chandigarh bad ka jingdonkam ia ka jaka ban shna ia ka Guest House na ka bynta ka jingdonkam ki nongpang.
Ula ban jur ruh ia ka jingdonkam ban ai ia ka kyrdan Institute of National Importance (INI) ia ka NEIGRIHMS ban iarap ha ka ban weng ia ki jingeh.
U MP ula kyntu ia ki nongpyniaid bad ia ki doctor ba kin ai da ka jingthoh kaba bniah halor ki jingdonkam khnang ba un lah ban shimkhia ha ka ban lah ban pynbeit noh mardor.
U Sangma ula ong ba ka thain baroh kawei ka phaikhmat sha ka NEIGRIHMS namar ba kadei ka Hospital kaba bha tam bad ka jaka ai jinghikai ha ka thain bad kumta un shimkhia mardor ia katei ka kam.
Ha ka jingialang, ula ong ba un lum ia ka jingialang bad baroh ki MP ka thain Shatei Lam Mihngi khlem da khein ia ka seng sain pyrthei kaba ki don hynrei ban iarap ban pynbeit ia ki kynrum kynram kiba kongsan ha NEIGRIHMS, namar ba kane ka jaka ai jingsumar ka long kaba kongsan bha ha ka thain̈.
U MP ula pynthikna ruh ba yn rah ruh ia ka jingkyrpad ka NEIGRIHMS’s na ka bynta ban ioh ia ka jaka ban tei ia ka Guest House na ka bynta ki nongpang hajan ka NEIGRIHMS, namar kane kan long ka jingiarap kaba khraw ia ki nongpang kiba wan na ki jaka kiba jngai ban ioh jingsumar hapoh ka Institute.
Ha katei ka jingjurip, u MP ula iakynduh ruh ia ki nongialam jongki nongtrei ka NEIGRIHMS Staff bad ia ki Nursing Association ruh.
 hadien ba ula shah thung dang shen kum u dkhot jong ka Governing Council.){kind=link}