Guwahati, Nailur 09: Ki Pulit ka Dibrugarh, ki la pynbna ia ka Sumi Borah, u Tarkik Borah, bad 2 ngut kiwei pat kum ki ‘Most Wanted’.
Haba iakren shaki lad pathai khubor u Superintendent of Police ka Dibrugarh, u Rakesh Reddy u la ong, “Ngi la pynmih ia ki jingpynbna ba ka Sumi Borah bad ia u kurim jong ka lem bad 2 ngut kiwei pat ba kidei ban wan mih hakhmat jong ngi hynrei kim shym la wan mih. Kumta, ngi la pynbna iaki kum ki ‘Most Wanted”.
Ia ka Case jong u Bishal Phukan la dep pynkynriah sha ka kynhun tohkit ba kyrpang jong ka CID.
“Ngi la kem ia 2 ngut ki briew ha kaba ia dei bad kane ka kam bad la kurup 18 tylli ki Bank Account jong u Bishal Phukan. Ngi la pynmih ia ka jingpynbna ban wad ia kine ki briew da kaba pynshong nongrim ia ki sakhi” ong u SP ka Dibrugarh.
Kane ka sienjam ka dei kaba la shim hapdeng ka jingtohkit kaba dang iaid shakhmat halor ka jingkynnoh ba ki donkti ha ka jyrsieh khaii Online kaba shongdor T.2,200 klur.
Ki pulit ki la sdang ia ka jingwad briew ban kem ia kine ki briew kiba la shah pynbna kum ki ‘Most Wanted’.
La lap ba ka Sumi Borah, kaba dei ka Actress bad nongshad ba pawnam ka Jylla Assam, ka la ioh pisa T.20 klur na u Bishal Phukan, uba dei u nongialam ia kane ka kynhun thok pisa Online.
La iathuh ba u Phukan u la pynlut bun tyngka naka bynta ka Borah, kaba kynthup T.1 klur tyngka na ka bynta ki jain kiba rem dor bad T.2.5 klur na ka bynta ban leit jngohkai shabar ri.
U Borah, uba phet na ki Pulit, ula shah kynnoh ba u la pynngop ia ki nongbei tyngka sha ka kompeni jong u Phukan da kaba kular ban ioh ia ka jingmih kaba heh lyngba ka jingkhaii online.
