Shillong, Nailar 18: Palat 82% ki kmie kpa kila dep mynjur bad kyrshan ia ka jingphah skul noh ia ki khun da ki bos skul ba lah pynkhreh da ka Sorkar Jylla.
Ia kane la pyntip da ka sorkar Jylla hakhmat ka Iingkashari Meghalaya High Court hynne ka sngi Balang haba shong bishar ia ka mukotduma ba la mudui da uwei u rangbag bah Philip Khrawbok Shati.
Ka hukum ba pynmih da ka Iingkashari ka ong ba ka Sorkar Jylla hadien ka jing iakren bad ki skul, palat 82% lah dep shim ia ka jingkyrshan ki kmie kpa ban leit on ne shaw skul noh da ki bos ban sa ai da ka sorkar Jylla.
Kane ka long ruh hadien ba u nongmudui ula ai jingmut ba ki bor sorkar ki dei ban shimkhia ha ka ban nym pynshlur ia ki kali shimet ba kin leit buh skul man ka sngi da kaba kit tang ia uwei ne kawei ka khynnah skul.
Ki skul mynta kila thaw ruh ia ka society ban pynthikna ba ki khynnah skul kin ioh pyndonkam ia ki bos skul ba la tyrwa ban shakri na ka bynta jong ki khnang ban lah pyn duna ia ka jinglum bun ki kali shimet hajan ki skul ha ka por long skul ne wai skul.
Ka sorkar Jylla ka lah tyrwa ruh ban thied hapdeng 50 haduh 60 tylli ki bos na ka bynta kane ka kam.
Ka hukum ka ong ruh ba ka sorkar Jylla ka lah pyntip ba ka lah dep die lilam ia kumba 53 tylli ki bos bym long pyndonkam shuh bad ia ka pisa ba mih lah kynshew ha ka kam ban pynjanai ia ka rukom pyniaid kali.
Ka Sorkar Jylla ka pyntip ruh ba ka lah dep phah ia ka jingtyrwa sha ka World Bank ban bei pisa na ka bynta ban thied ia ki bos ba iaid da ka bording elektrik ka ban pynthikna ia ka jingiaid khlem dheng ki kali bad ruh ka jingduna pynmih tdem jaboh.
Ka hukum ka ong ruh ba ki don katto katne ki jingai jingmut kynthup na u nongmudui na ka bynta ban shna ns pynheh ne maramot ia kj surok ba lah don lypa ka ban pynthikna ba ki kali na Jowai sha Guwahati kin ym donkam shuh ban rung lyngba ka Shillong lane kino kink ki kali kiba wan na ki thain Jaintia, la ki dei kiba leit sha Assam ne sha kiwei kiwei ki jaka.
Nalor ka Western Bypass ba donkam ban pyndep khrkieh noh, ki don ruh ki jingai jingmut ban pyniasoh ia ki surok ba don sha khapsor ka sor Shillong khnang ba kan pynduna ia ka jingdheng kali hapoh ka Nongbah.
Ia kine ki jingai jingmut lah bthah ban sa wanrah biang ha ka sien shong bishar ka ban long hadien shitaiew.
Halor ki artylli ki surok ban poi sha Air Force Station, Lum Shillong la ong ba ka surok na Upper Shillong ka dei kaba dang shu dep maramot bad pyniar katba ka surok na Laitkor ka dang dei ka ba sniew bad bym long iaid kali shuh.
Lada ia ka surok na Laitkor lah dep ban maramot, kane ka surok ka lah ban long ka lynti iaid ia ki kali na ri-lum Jaintia ki bym don jingthmu ban sangeh ha Shillong, ka la ong.
Ha kajuh ka por ka iingkashari ka la bthah ia ka Sorkar Jylla ban leh eiei noh pyrshah ia ki dukan beain ki ba don shabar ka Air Force Station.
Ka ong ba ka long ka jingma ia ka jingmih ki dukan beain bad khlem licence marjan bad ka Air Force Station na ka surok kaba wan na ka thain Upper Shillong.
Ka Iingkashari ka lah buh ban shong bishar biang ia kane ka mukotduma ha ka 29 tarik Nailar.
