Shillong, Nailur 05: Ki shipai iada khappud Border Security Force (BSF) bad ki Border Guard Bangladesh (BGB) ki la pynlong iaka Sector Commander level Coordination Meeting hajan Barsora Land Customs station ha Bangladesh.
Ia kane ka jingialang la pynlong kum shi bynta ban nang pynkhlain ia ka jingiadei jong ki arliang mamla, ban pynthikna ia ka jingiatreilang kaba kham bha, bad ban weng ia ki jingeh bapher bapher ha khappud.
Ia kynhun shipai BSF la ialam da u Sh Manoj Kumar Barnwal u DIG ka Sector HQ BSF Shillong katba u Md. Saiful Islam Chowdhury, Deputy Director General, Sector Commander BGB, Sylhet, Bangladesh ula ialam ia ka kynhun ki BGB.
Ha kane ka jingïakynduh ki heh shipai BSF bad BGB , la ïakren halor ki kam bapher bapher kiba ïadei bad u pud u sam kum ka Co-ordinated Border Management Plan bad kiwei kiwei ki kam ki ban pynmyntoi ia baroh arliang.
Ha kane ka jingialang, ki BSF bad BGB kila pynpaw ïa ka jingsngewkmen ïa ki jingïakren kiba don jingmut bad kiba ïajan, kiba pynpaw ïa ka jingïadei paralok bad kila kular ban pynroi ia ka jinglong jingman ha khappud bad wanrah iaka jingshngain.
Ia ka jingialang ka la pynkut da ka jingmut kaba bha ha kaba baroh arliang mamla ki la mynjur ban pynlong ia ki jingialang pyniadei man ka por ban pynthikna ia ka jingiatreilang.
