Naduh u 1972, ngi la mad ia ki jingshah thombor khlem sangeh
Shillong, Nailur 05: Ki Nongialam ka Labang Nongpyllut Pangam Raliang Area Committee (LNPRAC) kila aiti daka dorkhas sha u Myntri Rangbah ka Jylla u Conrad K Sangma ban pynpaw iaki jingeh jong ki nongshong shnong jong ki shnong haka thain Labang Nongphyllut ia kaba la tip kum ka Block I.
Ha katei ka dorkhas, ka LNPRAC ka la pynpaw ba ki nongshong shnong jong ka Labang Nonphyllut Doloiship ki la shah ieh bein ha ka sorkar naduh u snem, 1951.
“Katba ka Jylla Meghalaya ka dang rakhe ïa ka jingioh Jylla laka jong naduh u snem 1972, ki nongshong shnong jong ka Labang Nonphyllut Doloiship ki la mad ïa ka jingjynjar, ki jingsngewsih. Ia ka jinglong tynrai jong ki nongshong shnong la knieh daka Sorkar Assam da kaba kyntait ban ai ka jingithuh ia ka Labang Nongphyllut kum ka Doloiship. Kane ka la pynduh ia ki nongshong shnong ia ka jinglong tynrai jong ki haba iadei bad ka rukom bat ia ka khyndew ka shyiap, ki riti dustur bad ka jinglong kyrpang ka jaitbynriew” ong ka dorkhas.
Ka LNPRAC kala ong ba ka Sorkar Assam ka la pynrung jubor iaka Labang Nongphyllut sha u pud u sam jong ka Mikkir Hills Autonomous District Council ha u snem 1951 bad hadien kane ka wan ka jingshah thombor bad ki jingpynkhein ia ka hok longbriew manbriew kynthup ia ka jingshah lehbein, ka jingpyniap briew, ka jinglute, ka jingshah batbor bad ka jingshah set phatok.
Haba iaroh iaka Sorkar Jylla kaba dang don hapdeng ka jingiakren bad ka Sorkar Assam ban kynthup noh iaka ka Labang Nonphyllut Doloiship sha Meghalaya, ka LNPRAC ka kyntu ia ka Sorkar Jylla ban thaw noh mardor ia ka Joint Action Committee (JAC) kaba kynthup ia ki dkhot na ka Sorkar Pdeng, ka Sorkar Meghalaya bad ka Sorkar Assam.
‘Kane ka JAC ka dei ban peit ia ka bha ka miat, jong ki paidbah ka Labang Nongphyllut khamtam bad baroh 2 tylli ki Sorkar Jylla kim dei ban ia pyrshah iwei ia iwei pat ha kaba iadei bad ka roi ka par, ka bha ka miat, ka jingkiew bad ka jingshngain jong ki paidbah ka Labang Nongphyllut” la ong ka Dorkhas.
