Shillong, Nailar 17: Ka United Democratic Party (UDP), kala pdiang burom hynne ka sngi Balang ia ka jingwan iasoh jong u President ba dang shu shongthait jong ka seng FKJGP Bah Wellbirth Rani bad u Editor jong ka kot khubor Rupang Bah Monarch Shabong kum ki dkhot jong ka Party.
Ia kine ki arngut ki rangbah la pdiang burom da u President ka UDP bad Lamphang ka Iingdorbar Bah Metbah Lyngdoh ha ka jingiadonlang, u Working President Bah Paul Lyngdoh, General Secretary Bah Jemino Mawthoh, u President ka UDP- East Khasi Hills bad CEM ka KHADC Bah Titosstarwell Chyne bad ki MLA bad MDC ka party.
Haba kren ha ka jingialang, u President ka UDP ula ong ba ka jingwan pyniasoh jong u Bah Wellbirth Rani bad u Bah Monarch Shabong kan dei ka jingmyntoi kaba khraw ia ka Party namar baroh arngut ki dei kiba ju kren bha ia ki ishu kiba dei na ka bynta ka bha ka miat jong ki paidbah ka Jylla.
U Bah Metbah ula ong ba u Bah Wellbirth bad Bah Monarch kila pawkhmat bha hala ki jong ki kam ba ki trei bad ka jingwan pyniasoh jong ki sha ka UDP kan dei ka jingkyrkhu ia ka party kaba dang ialeh kat kaba lah ban lum ban lang ia ki Nongialam bad ki Nongkyrshan.
“Naba baroh arngut kila long ka sur ki paidbah la bun bun snem, kala dei ka por ia ki ban pyniasoh sha ka UDP bad ban shim ia ka bynta ba kongsan ha kaban pynkhlain ia ka mynsiem jinglong trai ri hapoh ka Jylla” ula ong.
U Bah Metbah ula ong baka UDP kala lah ban jop tang 8 seat ha ka elekshon 2018 hynrei mynta kala dei ka bor kaba lah ban khring ia ki paidbah bad ki Nongialam jong ki seng sain pyrthei bapher bapher ban pyniasoh sha ka UDP khamtam hadien ka party kala sdang ban pyni ia ka jingkhlain bor da ka jingjop ia ka elekshon shiteng samoi na Ranikor, Shella bad Mawphlang.
“Ka UDP mynta kala nang khlain nang khlain katba dang iaid ki sngi bad kane ka pynpaw ba ka UDP kan sa long ka bor ka ban ialam ia ka Sorkar Jylla hadien ka elekshon MLA 2023”.
