Shillong, Nailar 16: U President ba dang shu shongthait jong ka Federation of Khasi Jaintia & Garo People (FKJGP) Bah Wellbirth Rani ula pynpaw ba ka jingpyniasoh jong u sha ka seng United Democratic Party (UDP) ka dei kaba la rai halor ka nongrim ban shakri bad ban pynkhie im ia ka mynsiem jinglong trai ri (spirit of regionalism).
Une u Nongialam Sengbhalang uba la shakri haduh 25 snem ha ka FKJGP, ula kren ia kane ha ka jingialang pdiang burom jong ka UDP ia ka jingwan iasoh jong u bad u Editor ka kot khubor Rupang Bah Monarch Shabong ba long hynne ka sngi.
“Ka jingpyniasoh jong nga sha ka UDP ka dei kaba la leh da ka mynsiem ban ai ka jingshakri bad ban pynkhie im ia ka mynsiem jinglong trai ri. Lada ngim lah pynkhie im ia ka jinglong trai ri, ka Jaidbynriew kan ym poi shano shano ruh” ong u Bah Wellbirth.
“Lada ngi lah ban pynrung ia ka mynsiem sngewtrai, ka jingkyrmen ka don ia ka Jaidbynriew bad ka Jylla baroh kawei” ula ong.
Haba pynpaw baka rai ban pyniasoh sha ka UDP kam dei ka rai bala shim shimet hynrei kaba la iarailang bad baroh ki Nongkyrshan, u Bah Wellbirth ula ong “Nga sngew baka jingdonkam mynta ka long baka Jylla kan ioh noh ia ka sorkar ba ialam da ka seng trai ri kaba sngewthuh ia ka jingeh jong ki paidbah bad ba lah ban leh eiei na ka bynta ka bha ka miat jong ka Jylla baroh kawei”.
U Bah Wellbirth ula pynpaw ba haba peit ia ka jinglong jingman mynta, ka UDP khlem pep kan ioh ban ialam hi ia ka Sorkar Jylla hadien ka elekshon MLA 2023 ym shuh ban long ka nongbud namar ki paidbah ki ngeit ba ka Sorkar ba ialam da ki seng trai ri ka lah ban leh shibun kiei kiei halor ki ishu ba sahteng jong ka Jylla.
Ula bynrap ba watla ula pyniasoh ialade sha ka UDP, hynrei un dang iai bteng pat ban kren ia ki ishu kiba la rah iakren naduh ki por ba u ialam ia ka seng FKJGP.
“Ngam pat lah ban kynther ia ki ishu ba nga la rah naduh ba nga long nongialam Sengbhalang bad mynta ba nga lah rung sha ka Party, nga la rah lang ia ki ishu jong ka Jaidbynriew ban iasyllok bad ki nongialam jong ka party kumno ban leh ne pyrkhat” ula ong.
