Shillong, Nailar 31 : Ka Sorkar Jylla hynne ka step sngi Saitjain, kala aiti ia ka metiap jong u Nongialam ka Awami League Ishaque Ali Khan Panna sha ki Heh ka Bangladesh na Dawki Land Port hadien bala pyndep pynbiang lut ia baroh ki jingdonkam bad ki kot ki sla.
Hashuwa kane, ha ka por 5 baje mynstep, ia ka metiap u Panna la aiti sha u briew bala buh da ka Bangladesh High Commission, ha Khliehriat Civil Hospital, East Jaintia Hills District.
La pynkupbor ia une u briew ban pynithuh ia ka metiap bad pyndep ia baroh ki jingthoh jingtar ban pynthikna ia ka jingaiti ia ka met khlem kino kino ki jingwit sha ki bor ka Sorkar Bangladesh.
Na Khliehriat, ia ka met la kit sha Dawki Land Port ha West Jaintia Hills hapdeng ka jingpahara kaba jur. Nangne, la shimti ban pynkit pat ia ka met sha ka iingsah jong u ha Pirojpur District, ha Bangladesh.
U Panna u dei u General Secretary barim ka Bangladesh Chhatra League (BCL) bad u dkhot ba hakhmat bha jong ka Awami League bad uba iajan bha bad ka Myntri Rangbah duh barim ka Bangladesh ka Sheikh Hasina.
Ka Ministry of External Affairs, India bad ka Ministry of Fireign Affairs, Bangladesh kila don ka jingiakren kaba iajan bha naduh ka lap ia ka metiap u Panna na ka Bri kwai ha Dona Bhoi, East Jaintia Hills myn ha ka 26 tarik Nailar. Kane ka jaka ba lap ia ka metiap ka dei kaba jngai tang 1.5 km na khappud India-Bangladesh.
Ia ka metiap la ithuh lyngba ka Passport Bangladesh kaba don ha ka met jong u.
Ka metiap u Pana kala poi ha Dawki Lang Port ha ka por 8:30 baje mynstep bad ka shimjan jan 3 kynta ia ki shipai Bangladesh Border Guards bad kiwei ki bor pahara ba kin ioh jingbit ban shimti ia ka met bas ah u Panna.
