Agartala, Nailar 17 : Ka Tripura Pradesh Congress Committee ha ka sngi rakhe laitluid jong ka ri (Independence Day) ka la pyllait da u helpline number na ka bynta kito ki briew ki ba ngat ha ki jingshah banbor lyngba ki kam sain hima sima da ka party ka ba don ha ka bor synshar.
“Ka jingthmu ba kongsan jong une u helpline number ka long ba kan kylla long ka sur jong ki paidbah ki ba sngap jar na ka jingshah banbor lyngba ki kam sain hima,” ong u MLA ka Congress, u Sudip Roy Barman.
“Ngi la tip bha halor ka jinglong jingman ha ka jylla.Ngi la pyrshang ban tei pat ia ka jingsngew skhem hapdeng ki paidbah bad ban ai pat ha ki ia ka jingkyrmen.Ki lah ban pyndonkam da ki WhatsApp number ban pynpaw ia ki mat ki jong ki sha ngi.Ki lah ban dei ki mat ki ba iadei bad ki surok ki jong ki, ka leit ka wan, ki kam bam sap ha ki jingshakri paidbah bad kiwei pat.Ka Congress kan rah ia kine ki mat hakhmat ka sorkar lyngba ki jingiakhih sain hima.Ha kane ka rukom ka Congress kan kylla long ka sur na ka bynta kito ki bym lah ban pynpaw ia ki sur ki jong ki,” pynshai u Roy Barman.
Nalor kata u la ong ruh ba ka party synshar ka la wanrah ia ka jinglong jingman ka ba pynshong syier bad kino kino ki ba pyrshang ban ieng pyrshah ia ka sur jong ka party synshar, ki lah ban ngat ha ka jingshah bom shah tied ne kylla long ki lanot ha ki kynhun runar jong ka party synshar BJP.
“Ki briew ki ba la ngat ha kine ki jingiaumsnam sain hima kim lah ban pynpaw pyrshah namar ki don hapdeng ka jingsyier.Ki ba haiing hasem jong ki ki ngat ha ki jingshah byrthen, hynrei ka Congress kam don jingsyier. Ka thong ka jong ngi ka long tang bad ki paidbah,” ong shuh shuh utei u MLA ka Congress.
