Shillong, Nailar 16: U Myntri ka tnad Community & Rural Development ka sorkar jylla Bah Hamletson Dohling hynne ka sngi u la plie ia u mawnongrim ban tei noh ia ka ophis Block ba thymmai ha Mawsynram.
Ha kane ka sngi la iadon ryngkat u MLA katei ka constituency Bah HM Shangpliang, u Director ka tnad C&RD, u Project Director DRDA bad ruh u BDO katei ka Block.
Haba kren ha ka jingialang kaba long ha ka hall jong ka Seng Khasi u Kongsan u la ong ba ka sorkar jylla ka la iaid shakhmat mynta ban phah shna thymmai lut ia baroh 46 tylli ki block kiba don ha ka jylla.
“Ka jingpyntrei ia hynriew tylli ki block ba thymmai ki la dep ha ka jinglut kaba 2.50 klur tyngka bad ia kiba sah sa 40 tylli yn tei ha ka jinglut kaba 3 klur tyngka,” u la ong.
U Myntri u la iathuh ruh ba dalade hi u iohi ba ki ophis treikam jong ki block kylleng kylleng ki la julor lut watla kidei ki jaka treikam kaba iadei markhmat bad ki paidbah.
“Dei ha kane ka sorkar ba mynta ba ngi pyrkhat ba ngin trei ia kaei kaba kiwei pat ki sorkar ba la dep ki khlem trei,” u la bynrap biang.
U MLA u la ong ba mar ia jop ia ka elekshon, u la buddien ban ioh noh ia ka ophis treikam kaba thymmai kaba long kum ka jingpynkhreh na ka bynta ka Civil Sub-Division. U la iathuh ba jan man ka por u leit ban mih bad kyrpad ia u Myntri na ka bynta ban pynstet ia ka kam.
Na ka liang u MLA u la ai ruh ka jingiaroh ia ka rukom treikam jong kane ka sorkar jylla hapoh ka jingialam jong u Conrad K Sangma kum u Myntri Rangbah.
Ha kane ka sngi la ioh ruh ia ka jingkren na u Director ka tnad C&RD, u SC Sadhu kumjuh na u Project Director DRDA, Bah D Hynniewta bad ruh na u BDO ka Mawsynram, Bah P Mukhim
