Shen yn teh kyndon noh ka Sorkar ia ka jingiakop khwai dohkha
Shillong, Nailar 30 : U Myntri Rangbah ka Jylla Conrad K Sangma ha ka sngi Thohdieng, ula ong ba ka Sorkar Jylla kan sa shna sa 50 tylli ki pung pynkha symbai ban pynbun ia ka jingpynmih dohkha hapoh ka Jylla.
“ Ka jingpynkhreh ban shna haduh 50 tylli ki pung thymmai ban pynkha symbai dohkha kala iaid shaid shaid. Ngi la pyrshang ban pynbun ia ka jingpynmih dohkha haba khmih ia ka jingdawa kaba jur” ong u Conrad haba jubab hapoh ka Iingdorbar.
Ula ong ba na kine, 9 tylli ki pung pynkha symbai kila treikam bad 41 tylli kin sa treikam noh shen.
Kat kum ka jingong jong u, ka Jylla Meghalaya kala mad ia ka jingduna dohkha kaba kot ia ka 12000 metric ton, kaba long kumba T.250 klur.
Ula ong ba ka don ka por ba ka Meghalaya kala shalan jan 75% ka dohkha na shabar ka Jylla. “Mynta hadien ki prokram bapher bapher, ar-lai bynta jong ka dohkha la pynmih hi hapoh ka Jylla. Ka shimpor ia ngi ban leh ha ka rukom kaba heh bha hynrei ki kam kila iaid ha ka lynti kaba dei” ula bynrap.
U Myntri Rangbah ula pyntip ruh ba nalor ka jingai jinghikai ban pynjanai ia ka rukom pynmih dohkha, ka Sorkar kala ai ruh ia ki symbai haduh 5 million.
Kumba T.67 haduh T.72 klur la pynlut da ka Sorkar ban pynjanai ia ka jingpynmih dohkha ha kine ki ar haduh saw snem.
Ha kajuh ka por, u Myntri Rangbah ula pynbna ia ka rai jong ka Sorkar Jylla ban teh kyndon noh ia ki jingiakop khwai dohkha hapoh ka Jylla.
“Ngi dang pynkhreh ban teh kyndon noh. Ngi dang shna ia ki kyndon bad ngin sa iasyllok ia ki kynhun bapher bapher halor kane ka kam” ula ong.
