Pathsala, Nailar 17 : Ki trai shnong jong ka shnong Hatizan-Daodhara ka ba hap ha Baksa ka Assam ki la pyllait im u bsein Burmsese python u ba jrong haduh 14.9-phut bad u ba don ia ka jingkhia ka ba haduh kumba 100 kilo.
Hadien ba ki la sakhi ia une u python, ki trai shnong ki la pyntip mardor sha kawei ka kynhun aijingiarap ba la tip kum ka Manas Maozigendri Eco-tourism society ha ryngkat ki dkhot na ka tnat forest.
Kine ki kynhun ki la wan poi mardor ha katei ka jaka ba don une u bsein bad ioh ban pyllait noh ia u ban nym buh ia u ha ka jingma.
Hadien ba la thew la shem ba une u bsein u jrong haduh14.9 phut lane jan 4.5 mitar.Hadien la pyllait noh ia une u bsein hapoh ka jaka khlaw jong ka Manas National Park.
“Ki nongshong shnong ka thain ki la lapdien ia une u bsein bad pyntip noh sha ngi.Hadien ba ngi la ioh jingtip, ka kynhun jong ngi ka la wan poi ha katei ka jaka bad pyllait im ia une u bsein.Hadien ngi la pyllait noh ia une u pyrthong sha ka jaka khlaw jong ka Manas National Park”, ong u Ramesh Narzary u ba dei u secretary jong ka Manas Maozigendri Eco-tourism society.
Ki bsein Burmese python ki dei ki jait bsein ki ba heh tam napdeng ki jait bsein ha ki ba bun bah ki jaka ha ka thain shathie mihngi ka dewbah Asia.
