Shillong, Nailar 29: Ka Sorkar Jylla ka dang ap ia ka jubab na ka Sorkar Pdeng ha kaba iadei bad ka shithi kaba kala phah dang shen ba pynksan ba ka Meghalaya Residents Safety and Security (Amendment) Bill, 2020 ka dei kaba la shna kat kum ka Riti Synshar ka Ri bad kam don jingkhang satia ia ka jingiaid laitluid ha ka jylla.
Ha kajuh ka por, watla la pynsangeh shwa ia ka jingbuh ia ka Facilitation Centre hadien ka jingpynmih hukum jong ka Iingkashari, ka Sorkar Jylla kala pyntreikam ia kiwei pat ki kyndon jong ka MRSSA 2016 kaba iadei bad ka jingkhmih ia ki nongshongwai. Haduh mynta ki don 16 tylli ki Shnong kiba la pyntreikam ia katei ka ain kaba nyngkong.
Ia katei la iathuh da u Symbud Myntri Rangbah ka kam Pohiing (Police) Bah Prestone Tynsong, haba jubab ia ka Resolution kaba la wanrah da u Nongialam ka AITC bad u Myntri Rangbah barim ka jylla Dr Mukul Sangma hapoh ka Iingdorbar thawain ka jylla hynne ka sngi Palei.
Ia katei ka Resolution, la weng noh hadien, haba kyntu ia ka Sorkar ba kan pyntreikam noh ia ka MRSSA, 2016 katkum ka jingpynkup bor jong ka Ain ba nyngkong naka bynta ka bha ka miat jong ka jylla.
Ka Ministry of Home Affairs (MHA) lyngba ka shithi ha ka 16 tarik u Jylliew 2023 kala pyntip ia ka sorkar jylla ba ka jingpynbeit thymmai ia ka Bill ka paw kumba kala iaid palat ia ka jingthmu jong ka Meghalaya Residents Safety and Security Act, 2016 (MRSSA) da kaba pan ia ki jingtip na baroh ki briew (ha ka jaka jong ki nongshong wai kiba la shong lypa ha ka jylla) kiba rung shapoh ka jylla bad ban pynshitom ia ki lada kim ai jingtip. Katei ka jingpynbeit thymmai ia ka Bill ka paw ba ka long ka jingpynkheiñ ia ka Article 19 (1) (d) bad (e) jong ka riti synshar ka ri”. Kumta la pan ia ka jingpynshai halor kitei ki jinglap kiba la kdew haneng na ka sorkar jylla bad la ai jingmut ruh ia ka sorkar jylla ba kan khmih biang sa shisien ia katei ka Bill.
U Bah Prestone Tynsong ula pyntip ba ka sorkar jylla kala dep ban pynshai halor kitei ki jingpynsngew lyngba ka shithi ha ka 21 tarik u Rymphang 2023, ha kaba ka sorkar jylla kala ong ba ka Bill kadei kaba long katkum ka riti synshar ka ri bad kam shym la pynkheiñ satia ia ka Article 19 jong ka riti synshar ka ri hynrei ka Amendment kaba la wanrah kadei ban pynkhlain shuh shuh ia ka MRSS Act.
“Lyngba ka DO ha ka 14 tarik u Nailar 2024, sa kawei ka shithi la phah sha u Union Home Secretary, da u Chief Secretary kaba pynpaw biang ba ka Amendment Bill ka iaid katkum ka riti synshar bad ba ka jingpynkylla thymmai kam khanglad satia ïa ka leit ka wan laitluid ha ka jylla hynrei ka dei tang ban shim ia ki jingtip ban pynneh pynsah da ka jylla, kaba long ha ka jingbud ryntih ïa ki jingkhang kiba la shah katkum ka Article 19 (5) jong ka Riti Synshar,” ula ong bad ka pyntip ba ka sorkar jylla ka dang ap ïa ka jubab na ka Ministry of Home Affairs, ka Sorkar India.
“Ka sorkar jylla kala dep pyntreikam ïa ki bynta jong katei ka aiñ halor ka jingpynshisha ïa ki nongshongwai bad ka jingthaw ïa ka District Task Force ha baroh ki District. Nga sngewnguh ia ki shnong kiba don ha Shillong, kiba la mih shakhmat bad rejistar bad ruh ia kito kiba la sdang ban pyntreikam ia katei ka aiñ ban lum jingtip na ki nongshong wai. Nga ngeit skhem ba mynta ngi lah ban pyniaid shakhmat bad pyntreikam ïa katei ka kam ha kiwei ki district ruh lyngba ka District Task Force,” la bynrap u Symbud Myntri Rangbah ka jylla.
U Bah Prestone ula pyntip ba ia ka kam halor ka Meghalaya Residents Safety and Security (Amendment) Bill, 2020 ia kaba la buh kyrpang shwa da u Lat ka jylla ban ioh ia ka jingmynjur na ka President jong ka Ri kadei kaba la buddien da ka MHA.
“Ngi la dep phah ïa ka jubab kaba bniah bad ïa katei ka kam la buddien ruh da u Myntri Rangbah ka Jylla ha ka jingïalang ka jongu bad u Myntri Kam Pohïing ka ri dang shen ha Delhi ha ka 15 tarik u Naitung 2024,” u la ong.
Shuh shuh u Bah Prestone ula pyntip ba ka sorkar jylla kala pynsangeh shwa ia ka jingpynbna kaba la pynmih ha ka 17 tarik u Nohprah 2020 na ka bynta ban buh ia ki Facilitation Centre ha ki jaka rung bad jaka mih kaba don ha Umling, Ri Bhoi, Shillong Airport ha Umroi bad ka Mendipathar Railway Station ha North Garo Hills – hadien ki hukum ba la pynmih da ka Meghalaya High Court ha kaba ïadei bad ka PIL kaba tuklar ïa ka jingtreikam jong ka MRSSA, 2016.
“Ka hukum jong ka Meghalaya High Court ha ka 2 tarik Nohprah 2021 bad ban bud ryntih ia ka hukum jongka iingkashari, ia ka jingpynbna ha ka 17 tarik u Nohprah 2020 ban buh ia ki Facilitation Centre la buh shwa sharud haduh ban da pynmih da kawei pat ka hukum” ula ong bad ka bynrap ba namar ka jingsaphriang ka khlam COVID-19, ki jingdon jingem ha ki Facilitation Centres ha Umling ha Ri Bhoi District, Shillong Airport ha Umroi, Ri Bhoi bad Mendipathar Railway Station, North Garo Hills District la aiti noh sha ka tnad ka koit ka khiah ban pyndonkam kum ki COVID -19 Screening Centre.
Ula ong, watla ka sorkar jylla kala buh shwa sha kyndong ban buh ia ki Facilitation Centres namar ka jingpynmih hukum ka Meghalaya High Court, hynrei ki kam ha kaban pyntreikam ia kiwei pat ki kyndon jong ka ain ym shym la buh noh sha kyndong bad ka sorkar kala iaid shakhmat ha kaban pyntreikam ia ki kyndopn kaba iadei ban peit ia ka jingshisha jong ki nongshongwai.
Ka Section 6,7,8,9 bad 10 jongka Act ka ailad ban pynshisha ia ki nongshongwai bad ban lum thup ia ki jingtip jong ki nongshongwai hapoh ka jingkhmih jingpeit jong ka District Task Force.
Ban pynbeit ryntih ia ka rukom pynrung kyrteng kumba la pynkupbor lyngba ka MRSSA bad ban pynthikna ba kan don ka thup kyrtengbad ki jingtip jong ki nongshongwai, ka sorkar kala sdang ia ka Online Portal ha ka 8 tarik u Nailur 2022, kaba lah ban ioh na https://megrssa.nic.in. Kiba lah ban pyndonkam ia ka Web Portal ki kynthup ia ki nongshongwai, ki trai jaka, ki shnong ki thaw, (rangbah shnong), ki police station bad ka district task force.
Ïa kane ka online portal la thaw khnang ban pynsuk ïa ka jingbuh ryntih ïa ki jingtip kiba lah ban peit da ki bor bapher bapher katkum ba la pynkupbor da ka aiñ.
Ia kane ka online portal la pyntreikam kum ka jingpyrshang ha ki 7 tylli ki shnong kiba don hapoh jong ka East Khasi Hills District kiba kynthup ia ka Nongrim Hills, Pohkseh, Nongrah, Nongmensong, Lapalang, Riat Laban bad Wahdienglieng.
Ka Shillong ha East Khasi Hills kala shah jied kum ka nongbah, ka don ia ki nongshongwai kiba sah hangne bad kiba trei ha ki ophis treikam bapher jong ka sorkar pdeng bad ki riewshimet.
Ïa kane ka jingpyntreikam la leh, hadien ba la ïakren bad ïapynbeit bniah bad ki dorbar shnong bapher. 18 tylli ki jingai jinghikai laleh halor ka jingpyndonkam ia ka portal jong ka MRSSA la pynlong ruh da u Deputy Commissioner, ka East Khasi Hills ha ki shnong bapher bapher.
Katkum ka Section 3 jong ka ain, ki nongshongwai ki dei ban ai jingtip shaphang ka jingshim wai ka jongki ia ka iingshongwai sha ki bor shnong bad ki pulit. Ka Section 7 jong ka aiñ, “Uno uno u trai iing uba thmu ban ai wai ïa ka ïing jongu ne ka jaka kaba u ai wai sha u nongshong wai, u dei ban ïoh jingbit na ka bor shnong bad dei ruh ban don iaka jingpynthymmai.”
Kumba la iohi ia katei ka Section, ki bor synshar shnong kaba kynthup ia u Rangbah Shnong, Dolloi ne Nokma ki don iaka bynta kaba khraw bha ha ka jingpynshisha ia ki nongshongwai.
Nalor kane u Bah Prestone ula pyntip ba kumba long mynta, 87 tylli kishnong bad 177tylli ki shnad shnong ha East Khasi Hills kila dep ban rejistar ha ka MRSSA portal.
“Na kitei, 16 tylli ki shnong kila sdang pyntreikam ia ka Act. Haduh mynta, 183 ngut ki nongshongwai kila dep rejistar ha ka portal,” ula ong, bad ka bynrap ba nalor jong ka District Task Force jongka East Khasi Hills, la pynlong bun tylli kijingialang da ki District Task Force ha baroh ki District ban pyntreikam ia ka MRSSA, 2016.
