Shillong, Nailar 27 : U Symbud Myntri Rangbah ka Jylla Bah Prestone Tynsong ha ka sngi Ba-ar, ula ong ba ha kine ki hynniew snem kata 2017-2024, ka jingdon ki bym iohkam iohjam ha Meghalaya kala pyni ba kala hiar bha, kaba sdang n aka 8.8% ha u 2017-2018 bad hiar sha ka 1.9% ha u 2021-22.
Ula kren ia kane haba kdew sha ka jingkhein bala lum da ka Centre for Monitoring of Indian Economy.
Haba jubab ia ka special motion bala wanrah da u MLA ka UDP Bah Lahkmen Rymbui ha Iingdorbar, u Bah Prestone ula ong ba ka jingdon ki briew bym don kam don jam ha Meghalaya ka kot 3.9% katba ha India kala kot haduh 7%. Kumjuh ruh, ka jingkhein bala lum da ka PLFS ia ka Meghalaya, la pyni ia ka jingneh kumjuh ka jingdon ki briew khlem ba kot 2.92% haba nujor bad ka national average kaba kot 4.7% ha kine kijuh ki snem.
“Ka jingdon ki briew ba khlem kam khlem jam ha Meghalaya ka kham rit ban ia ka national average hapdeng kine ki tyllong lum jingkhein. Ki jingkhein ki pyni ba ka iew aikam ha Meghalaya ka kham biang bad kham khlain ha kaban thaw ia ki lad aikam aijam haba nujor ia kaei kaba long hapoh ka Ri” ula ong.
Haba kren halor ki sienjam bapher bapher bala shim da ka Sorkar ban leh eiei halor ka jingeh na ka jingbym iohkam iohjam, u Bah Prestone ula ong ba ka Sorkar ka don ia ka thong ban pynkha ia ka iohkam iohjam sa 5 lak ngut hapoh u snem 2028.
Haduh 2.3 lak na kine kin wan lyngba ka rep ka riang bad kiwei kiwei ki kam ba don jingiadei bad ka rep ka riang. Bud ia kane, ka dei ka khaii ka pateng, ki hotel bad ka Transport, kaba la khmih lynti ban aikam haduh 1.5 lak ngut.
Ki kam tei jingtei bad ki jingpynmih ia ki mar ki mata kin aijam ia 53,000 bad 23000 ngut. Ka kam tih marpoh khyndew bad ka kam pynmih bording ruh kin aikam ia kumba 7500 ngut katba ki real estate kin aikam haduh 2500 ngut.
U pyntip ba haduh mynta, ka Sorkar kala kynshew haduh T.7 klur ha ka Skill Meghalaya Programme. Ula pyntip ba la khmih lynti ba ka kamai ba shisnem da ki briew ba ioh jingmyntoi kan kot haduh T.37 klur ha ka snem.
Ka Sorkar kala buh ruh ia ka mang pisa ba palat T.53 klur kum ka bai ai jinghikai bad T.31 klur kum ki start—up tools ban ai jinghikai sa kumba 26000 ngut ki nongioh bynta hapdeng u snem 2024-2025, ula bynrap.
Nalor kane, u Bah Prestone ula ong ba ka Sorkar kala pyrshang kat kaba lah ban pynkha ia ki lad iohkam iohjam ha Jylla bad ban leh eiei halor ka jingeh jong ka jingbym iohkam iohjam ki nongshongshnong.
Haba pynpaw ba ka Sorkar Meghalaya dalade ka dei ka nongpynkha ia ki lad iohkam iohjam ha Jylla, u Symbud Myntri Rangbah ula ong ba kat kum ka khana samari jong ki nongtrei Sorkar ha u 2022, ka jingdon ki nongtrei hapoh ka Sorkar Meghalaya kat haduh ka 31 tarik Lber 2022 kala kot ia ka 60,836 ngut.
U pyntip ba ka Sorkar kala wanrah ia ka SOP ban pyntip hapoh ka pork aba biang ia ki jinglaitkam, jingpynbna ba lait ki kam bad ka jingpynlong ia ki eksamin thungkam kat kum ka por. Haduh 954 ngut ki kyrtong bad 92 ngut ki kyrtong la phah kyrteng da ka MPSC bad ki DSC naduh u Iaiong 2021.
Hapoh ka Central Recruitment Board, ula ong ba 996 tylli ki kam kiba lait ha ki kyrdan bapher bapher hapoh ka Tnad Pulit lah dep ban thung briew ha u snem 2023 bad kumba 3000 tylli ki kam balait yn sa thung briew ha u 2024.
Ka Meghalaya Medical Recruitment Board kala lah ban thung briew haduh 455 ngut ha ki kam ba lait kynthup ia 103 ngut ki doktor specialist bad kumba 164 tylli kam nos bad 78 ki ANM yn sa thung briew noh shen, ula bynrap.
