Lakhimpur, Nailar 16 : Ka jinglong jingman ha ki thain khappud ka Assam-Arunachal Pradesh ki ba don hapdeng ka jingiakynad ka dang iai buh ha ka jingshong syier hadien ka jingmih ka huri hura ha ki bynta jong ka Rupahi Rajgarh hapoh Lakhimpur district ka Assam.
Ka kynhun ki runar ia ka ba la kam ba ki dei napoh Arunachal Pradesh la kynnoh ba ki la thombor ia ki dkhot ka Village Defence Party (VDP) ha ki bynta jong ka Rupahi Rajgarh ka ba hapoh Lakhimpur district ka Assam.
Ha kane ka jingjia shah thombor kumba hynriew ngut ki briew ki la ngat ha ka jingmynsaw, ong ka khubor pulit hynne ka sngi ba Ar. Hadien kane ka jingjia, ka jinglong jingman ka la don hapdeng ka jingsyier ha ki bynta khappud jong kine ki artylli ki jylla.
Na ka liang ka All Assam Students’ Union (AASU) ka la khot pynlong da ka pakhang ia ka surok highway ka ba lam sha Arunachal Pradesh.
Ki khubor ki iathuh ba kine ki dkhot VDP ki la buh jingkylli ia ki sawngut ki samla ki ba dei na Arunachal Pradesh hadien ba ki la lapdien ia ki katba ki dang shang makia da ka kali ha ki bynta jong katei ka thain.
“Ki dkhot VDP ki la pyllait noh ia kine ki samla hadien ba ki la dep ban kylli jingkylli. Hynrei, kine ki briew ki la wanphai biang hadien katto katne por ha ryngkat kumba 40 ngut ki riew runar ki ba la thombor ia ki dkhot ka VDP,” ong ka khubor pulit.
Na ka liang ka AASU ka la weng noh ia kane ka pakhang surok hadien ba ka la ioh ia ka jingpynthikna na ki heh sorkar ka Arunachal ba kitei ki briew ki ba donkti ha katei ka kam thombor kin ngat ha ka jingshah pynshitom.
