Shillong, Nailar 24 : Ka shongshit phutbol ha Nongbah Shillong kaba kynjoh sha kawei pat ka kyndan, ha kaba la sakhi ba ki riew ieid phutbol kila ieng lain naduh dang step ban ioh ia ka ticket ha kaban ioh sakhi ia ka jingialehkai Northeast derby hapdeng ka Shillong Lajong FC pyrshah ia ka North East United FC, ka ban long la sngi Nyngkong ha Jawaharlal Nehru Stadium, Shillong.
Kane ka semi-final ba nyngkong eh jong ka Durand Cup 2024 ka dei kaba la buh ban long ha Kolkata hynrei namar ka jingthut ka shongsuk shongsain bad jingkyrpad ka Sorkar Meghalaya, nalor ki hajar ngut ki riew ieid phutbol, ki nongpyniaid kilapynkynriah noh ia ka jingiakhun sha Shillong.
Hadien kane ka jingpynkynriah madan, ki nongpyniaid kila sdang ia ka jingdie ticket jong ka Phase-I ha ka sngi Thohdieng. Mar syn plie ia ka iew ticket, ki ticket kila lut ploin tang da ki khyllip mat.
Ki Nongpyniaid kila pynbna ba ka phase-II jong ka jingdie ticket kan long ha ki lai tylli ki jaka-la Laitumkhrah, Khyndailad bad Golf Link ha ka sngi Saitjain por 2 baje janmiet.
Hynrei, ki riew ieid phutbol ka Shillong kim lah satia ban ap ia ka 2 baje janmiet bad kila sdang ban leit ieng lain naduh ka por 6 baje mynstep jong ka sngi Saitjain. Mar syn plie ia ka iew, ka jingdie ia ki ticket kam shym la shimpor ban lut lut ploin.
Kiba bun bah ki riewieid phutbol kiba la leit ieng lain naduh mynstep, kila sdang kynnoh ruh ia ki briew kiba don ha ka bor ba kila shim ia kiba bun ki ticket jong kane ka semi-final ban sam shala ki jong ki briew.
Ki Pulit kila hap ban mih shakhmat bad leit pahara ha ki jaka die ticket ban tehlakam ioh mih kano kano ka jingkulmar. Hynrei haduh mynta, ym shym la don satia kano kano ka jingjia.
Ka JN Stadium kaba lah ban ngiam haduh 30,000 tam, ki bor pyniaid ka Durand Cup kim dei satia ban pynduna ia ka jingdie ticket, ong uwei na ki riew ieid phutbol uba la leit ieng lain naduh mynstep.
Ki bor pyniaid kila pynsangeh ia ka jingdie ticket mynta hynrei ki khubor ki pyntip ba kan sa don sa ka jingdie online ia ki ticket mynta hi ka miet sngi Saitjain naduh ka por 8 baje.
La pyntip ba ka jingdie ticket kan don biang ha ka sngi U Blei, kaba mut kin dang don bun ki nongkyrshan nala iing,ki ban ioh rung sha madan.
Kawei ka khubor ka bym pat lah pynthikna, ka pyntip ba u trai ka North East United John Abraham un wan ban peitkai ia kane ka jingiakhun ha Shillng ha ryngkat bad 6000 ngut ki nongkyrshan, kaba batai shai ia ka jingduna ki ticket ia ki nongkyrshan nala iing.
