Nongpoh, Nailar 23: Ki Pulit ka Ri Bhoi District, ha ka sngi Palei, ki la ioh tam ia kawei ka metiap ba la sdang pyut jong ka samla kynthei na kawei ka jaka ba don hajan ka CMJ University, Jorabat.
Ia kane ka metiap la lap ha ka por janmiet hadien ka jingioh khubor ba pyntip ia ka jingdon jong ka metiap hajan kane ka skul bah, kaba la shah khang khyrdep.
Namar ka jingdum ka miet, ki Pulit ki khlem lah ban pynlong ia ka jingtohkit bad ia ka metiap la rah noh sha Civil Hospital, Nongpoh ban pyndep ia ka post mortem.
Hynrei hynne ka sngi Thohdieng, ki bahaiing hasem kila wan kam ia kane ka metiap hadien ka jingiohi ia ka khubor bad kila pynithuh ruh ba ka dei ka Pooja Majumdar, 23 snem ka rta, kaba la jah nala iing na Koinadhara, Khanapara naduh ka 19 tarik u Nailar.
Hadien ka jingleh post mortem, ki Pulit kila aiti noh ia ka met kaba sah sha ki bahaiing ba kin pyndep ia ka lehniam leh rukom kaba khatduh.
Ka jingtohkit halor kane ka jinglap ia ka metiap ka dang iaid shakhmat.
