U Bah Himalaya Shangpliang u dei uba biang eh na Mawsynram
Shillong, Nailar 16: U Nongialam ka BJP bad Myntri Sorkar Bah Sanbor Shullai ula kyrshan ia u Bah Ernest Mawrie ban iai bteng shuwa kum u President ka Bharatiya Janata Party (BJP) haduh ba kut ka samoi bad ong, “Ka jingbujli ia u President ha kum kane ka por kam dei kaei kaei ruh hynrei kan buh jingma ia ka party”.
Kane ka jingkren u Bah Sanbor kala mih halor ka jingkynthoh u National Vice President ba khmih ia ka Meghalaya u Dr Chuba Ao ba dawa ia u Bah Ernest ban shongthait noh dalade kum u President.
Haba kynnoh ba u Bah Ernest ula pynjot ia ka BJP ha Meghalaya, u Dr AO ula pynpaw ia ka jingpyrshah iaka rukom treikam u Bah Ernest bad kynthoh ruh da kaba ong “U Bah Ernest u dei ban sngew thuh ba ka BJP kam dei ka party shimet jong u. Ula kren bein ia ki MLA bad ki briew ba kwah long kyrtong iakhun elekshon bad wat ia u Myntri Rangbah Duh Narendra Modi bad ia u National President JP Nadda”.
Haba kyrshan ia ka jingkren u Bah Ernest ba ong ka jingai ia ki Ticket ka BJP ka dei ban long hadien ka jingiaid survey bad jingshong bishar bha, u Bah Sanbor ula ong “ Kam don satia ka jingbakla halor katei ka nongrim ba u kren. Ka jingdonkam ha kane ka por ka long ba ngi dei ban iatylli kawei bad iatreilang”
U Bah Sanbor u pyntip ba ula dep kren ruh ia u Dr Chuba Ao bad ia kiwei ki Nongialam na Delhi haba kyrpad ia ki ba kin sangeh noh ha kaban bujli ia u President ka Party ha kum kane ka por ba donkam.
“Nga hi shimet nga sngew ba u Bah Ernest ula ieng ha syndah ka Party ha ki jingkynrum kynram ba dang shen bad ula ai mynsiem ruh ia ki Dkhot ka Party kiba na Ri-lum Garo” ong u Bah Sanbor.
Haba pynpaw ia ka jingpdiang sngewbha ia ka khubor ban wan pyniasoh u MLA ka AITC na Mawsynram Bah Himalaya Shangpliang sha ka BJP, u bah Sanbor ula ong ba u Bah Hima u dei u briew uba biang eh ia ka Mawsynram haba bynrap “Ngan sa kren hi ia ki Nongialam ka Party ban iatreilang bad u lada u pyniasoh noh sha ka Party”.
Une u Nongialam ka BJP ula iathuh ruh ba ula dep iakren ia ki katto katne ngut ki MLA, MDC ka Ri-lum Jaintia bad ban pynthikna ba ka BJP kan ioh ia ka jingjop haduh 5 seat na Ri-lum Khasi Jaintia ha kane ka elekshon ban wan.
“Ka BJP kan tam ia ka 10 ngut ha ka jingdon ki MLA ha ka elekshon ban wan hynrei nyngkong ngi dei ban pynsangeh shuwa ia baroh ki jingiashrut bad jingiamih kynhun hapoh ka party” ula ong.
“Kino kino na ka BJP kiba don ia kano kano ka jingeh ki lah ban iakynduh shimet ia nga bad ngin sa pynbeit ia kine ki jingeh lada dei kiba don nongrim shisha” ula bynrap.
U Bah Sanbor ula kyntu ruh ia ki Nongialam ba kin trei na ka bynta ka BJP haba ong “Namar ka por kam don shuh, ka jingbujli ia u President kala dier palat bad kane ka lah ban wanrah ia ka jingphet seng jong ki Nongialam bad ki nongkitkam ka Party”.
U Bah Sanbor ula ong ba ka BJP kan sa ialam ia ka Sorkar ha u snem 2023 haba ong “Ngan iai bteng beit ban ieng iada ia ka Party lada don ki Political Party ne ki Nongialam kiba pyrshang ban pynthohbria ia ka BJP”.
U Bah Sanbor ula ong ba ka BJP ha Delhi bad ka Jylla ki dei ban trei khlem shongthait na ka bynta ki paidbah bad ruh bad ki paralok ba iatreilang.
