Shillong, Nailar 16: Ka All Meghalaya Karate-Do Association kala pyntip ba saw ngut ki Nongialehkai Karate (Karatekas) kila shah jied ban leit ialehkai ha ka lympung Thailand Open Karate-Do Championship ka ban long ha Phuket naduh ka 19 tarik Nailar.
Kine ki Nongialehkai karate ki kynthup ia u samla Ferdinand S Rani, Gregorwilson Makdoh, Saralin Rynghang bad u samla Damanbha Pde. Kine ki samla ki dei kiba la jop ia ki takma ha ki lympung ialehkai ha Jylla, Regional bad National Level.
Kine ki samla kin mih ha ka 18 tarik Nailar ban leit sha Delhi ban iadonlang bad ka kynhun ki nongialehkai ka India bad kin sa mih ha ka step 19 tarik ban leit sha Thailand.
Kane ka lympung kan sdang ha ka 20 tarik da ka ‘Kumite’ bad ‘Kata’ bad ka jingialehkai pat kan kut ha ka 23 tarik Nailar. Kine ki nongialehkai karate kin wan phai sha India ha ka sngi ba bud.
Ha u bnai bala lah, u Damanbha Pde ula jop ia ka takma rupa bad i samla Saralin i la jop ia ka takma rnong ha ka All India Karate Championship kaba long ha Chhattisgarh.
Hashuwa ka Covid-19, u samla Gregorwilson bad Ferdinand kila jop ia ka takma ksiar bad takma rupa ha ka Kanninjuku National Subroto Cup Karate Championship ba long ha Maharashtra.
“Ka Association ka kwah ia kine ki samla ialehkai karate ban ioh mad ia ki jingialehkai shabar ka Ri namar ha kine ki arsnem bala leit noh, kim shym la ioh satia ban ialehkai” ong u Bah Hunlang Lytan, President ka AMKA haba kdew ia ka jingpynthut ka khlam Covid-19.
“Kine ki samla kila iashimbynta ha ki Lympung ialehkai hapoh ka Ri hynrei ka iapher bak ly bak bad ka jingleit ialehkai shabar ka Ri” ula bynrap haba ai khublei ia ki Kmie Kpa kiba la kyrshan ia kine ki samla ha ka jingiaid lynti jong ki kum ki nongialehkai karate.
Ka AMKA ka dei ka kynhun kaba pawbha bad kaba la wanrah bha ia ka nam ia ka Jylla Meghalaya lyngba ka jingioh ia ki takma na ki lympung ialehkai bapher bapher. Kane kam dei satia ka sien kaba nyngkong ba ki nongialehkai karate kin leit ialehkai shabar ka Ri.
Ha u Naiwieng 2019, I samla Wandahunshisha Mawblei ila ioh ia ka takma ksiar ia ka India ha ka 5th South Asian Karate Championship ba long ha Bangladesh. Haba phaidien, u samla Damang Syngkon ula ioh ia ka takma ksiar ha ka South Asian Games jong u snem 1999. U Damand, I Linza F Syiem bad Wandashisha Warjri kila ioh ruh ia ki takma ha ka 34th National Games jong u snem 2011 na ka bynta ka Meghalaya.
“Ka Thailand Open ka dei ka lympung ialehkai kaba heh bha kaba khring ia bun ki nongialehkai Karate na kylleng ki Ri ka Pyrthei. Ha ka sien ba khatduh kila don ruh ki nongialehkai karate kiba leit ruh ban iashimbynta ha ka Olympic Games ba long mynshem snem. Kane ka dei ka kabu ksiar ia kine ki 4 ngut ki samla jong ngi” ong u General Secretary ka AMKA Bah Ksan Kupar Warjri haba ai jingiaroh ia ki Coach ba kynthup ia u bah Donboklang Lyngdoh, Arjun Sewa, Linza Syiem bad Mingson Rymbai.
“Nga kyrmen ba kine ki 4 ngut ki ialehkai bha, kin pyni ia ka jingiakhun naduh ka mynsiem bad ban wan phai bad sam lem ia kiei kiba kila ioh jinghikai na kane ka lympung sha ki nongialehkai ba dang kham khynnah” ula ong.
