Shillong, Nailar 16: Kum shibynta jong ka jingrakhe ia ka jingdap 75 snem ka jingioh laitluid ka Ri, ka Department of Telecommunication (DOT) North East Licenced Service Area (NELSA) Shillong, hynnin ka sngi nyngkong kala pynbna ia ka jingpyntreikam noh ia lai tylli ki Tower thymmai ba la pyndait da ki kor ka juk ba mynta ha ki lai tylli ki shnong nongkyndong ka Ri-lum Khasi.
Ia kine ki tower thymmai la pynieng naka Universsal Service Obligation Fund (USOF) ha ka shnong Panchiring, South West Khasi Hills, ha Mawpen bad Katradua kiba don ha East Khasi Hills District.
Ki Nongshongshnong jongki 7 tylli ki Shnong ba kynthup ia ka Panchiring A, Mawpen, Katradua, Mawhati Phudkroh, Pancharing B bad Upper Panchiring kin sa ioh ha ka sien nyngkong eh mynta ia ka telecom service ka juk ba mynta hadien ka jingrakhe laitluid, ka ban long da ka high-speed 4G mobile broadband service ba kin ioh ia ki jingshakri e-service jong ka Sorkar na Delhi bad ka Jylla.
Da ka jingwanrah ia kine ki tower, ka jingpyndonkam mobile phone mynta kala poi sha ki 5540 tylli ki shnong ka Jylla Meghalaya lyngba ki kompani bala ioh licence na ka DOT.
Kum shibynta jong ka jingrakhe AKAM ha u snem bala lah, haduh 368 tylli ki tower tymmai, 743 tylli ki Base Transceiver Station (BTS) la shna thymmai bad 507 tylli ki Shnong kila ioh pyndonkam ia ki kor mobile hapoh ka Jylla.
U Ravi Goel, Sr. Dy Director General & Hheduh ka NE LSA , ula pyntip ba ka jingai thymmai ia ka 4G service sha ki 1512 tylli ki Shnong ka Jylla Meghalaya ka dei kaba la tyrwa da ka DoT NELSA. Kum kane kajuh ka jingtyrwa la phah ruh sha ka DoT na ka bynta ka Jylla Arunachal Pradesh, Manipur, Mizoram, Nagaland bad Tripura.
U Goel u pyntip ba kum shibynta ban wanrah ia ka jingshngain ki paidbah naka EMF radiation, ka India kala pyntreikam ia ki kyndon kiba pyrkhing haduh 10 shah kumba la bthah da ka ICNIRP bad ban pynthikna ruh ia kane, ka DoT NELSA kala ju leh test man ka por ia ki BTS ba kin pyntreikam thik pa thik ia ki kyndon.
U pyntip ba haduh mynta, kumba 3557 tylli ki BTS naka 7190 tylli lah dep ban leh test Radiation ha Jylla Meghalaya bad baroh la slem ba ki long kat kum ki kyndon bala buh.
U Goel u pyntip ba da ka jingwan sa ka 5G service hapoh ka Ri, katto katne ki small cell 5G mobile tower kin long kiba donkam ban pynieng ha ka thain shatei lam mihngi. Hynrei u ong ba ki paidbah kim dei ban khuslai halor ka jingktah ia ka koit ka khiah ne ka jingim ki briew bad ki jingthaw ba im ha sawdong sawdon ka thain, namar kala don ka kyndon bala buh da ka DoT ban pynthikna ia ka jingshngain.
Khnang ba baroh kin ioh pyndonkam ia ka kor internet ha ka dor kaba jem, ka PM-WANI service kala don mynta lyngba ki Public Data Office Aggregators (PDOAs) bad ki Public Data Offices (PDOs).
Kan dei ban kabu ia ki nongshong dukan kum ki Fair Price Shop, Kirana shop bad wat ki dukan kwai ba kin ioh kamai. Ka DoT kala dep pyllait ia 1061 tylli ki hotspot haduh ka 8 tarik Nailar 2022 ha ki Jylla ka thain Shatei Lam Mihngi
