Ka jingpynkha ia ki C&RD Block ka dei ka kam ba iai bteng na ka por sha ka por : Mondal

Shillong Nailar 20: U Myntri ka tnad Community & Rural Development (C&RD) u Abu Taher Mondal hynne ka sngi Baar ula ong ba ka jingpynkha ia ki C&RD Block ka dei ka kam kaba iai bteng na ka por sha ka por.

“Kam dei tang namar ba ngi la pynkha katto katne tylli ki Block ha ka samoi treikam kaba la dep kumta ngin nym thaw shuh ia ki Block,” ong u Mondal haba jubab ia ka jingkylli halor ka jingdawa ban thaw ia ka Mawsynram block.

“Ka shong ha ki jingeh kiba ki briew jong ngi ki mad ban poi sha ki Administrative Unit, halor kata ka nongrim ngi pynkha ia ki Block bad ka dei ka kam kaba iai bteng bad kaba iaid shakhmat. Hadien ba ngi la pyndep lut ia ki kam ki jam baroh ngin sa pynbna, kan shong ha kano ka rukom ngi pyniaid ia ka” ula ong.

Halor ka jingkylli, u Myntri ula ong “Ia mynta hi, ngam pat lah ban ong lano ngin ai ia ka jingpynbna”.

Kumba long mynta, ka jylla ka don haduh 51 tylli ki C&RD Block hadien ba la dep ban thaw thymmai sa 15 tylli ki Block ha kine ki 10 snem kiba la dep.

U Myntri Sorkar kham mynshwa ula pyntip ba ka sorkar jylla kala pynlut palat T.3 klur na ka bynta ban pynbiang ia ki jingtei jong ki Block kiba dang thaw thymmai. Ula ong, ba dang shen la plie paidbah ia ki jingtei jong ka Samanda bad Betasing Block.