Shillong, Nailar 16 : Ka FIFA Council ka la rai ban sospon lut ia baroh ki kam jong ka All India Football Federation (AIFF) mardor halor ka nongrim ba ki don ki bor kiba nabar (third parties), kaba long pyrshah ia ki kyndon treikam jong ka FIFA.
Kane kadei ka sien kaba nyngkong eh ha ka history jong ka All India Football Federation (AIFF) ban ngat ha katei ka jingshah sospon ha kine ki 85 snem ka jingshakri jong ka.
Ia kane ka rai sospon yn sa weng noh hadien ba la mih ka hukum ban thaw noh ia ka committee of administrator ban treikam kum ka AIFF Executive Committee la dep ban bujli bad ba ki bor pyniaid jong ka AIFF kin ioh biang ban pyniaid ia ki kam kumba ju leh.
Katei ka jingsospon ka mut kan ktah ruh wat ia ka lympung FIFA U-17 Women’s World Cup 2022 kaba la buh ban pynlong ha India ha u Risaw 11-30tarik mynta u snem, hynrei mynta na katei ka daw yn ym lah shuh ban pynlong ha India bad na ka liang ka FFIA kan sa shim ki sienjam haba iadei bad katei ka lympung ialehkai bad aiti ia ka sha ka Bureau of the Council lada i donkam. Ia mynta ka FIFA ka dang iai bteng ban ia syllok bad ka Ministry of Youth Affairs and Sports jong ka ri India bad kyrmen ba ka jingmih na katei ka jingiakren kan long kaba seisoh.
Haduh mynta katei ka rai sospon kan iai bteng beit katba ka All India Football Federation (AIFF) kam pat ioh ia ka bor ban pyniaid biang ia ki kam jong ka baroh kumba ju long, ong ka FIFA ha ka jingpyllait khubor.
Ha kawei pat ka liang, u kapten barim jong ka kynhun ialehkai phutbol ka Ri, u Baichung Bhutia uba dei mynta uwei na ki nongialam ha ka sain pyrthei u la ong ba katei ka sienjam kadei kaba kyndit bad kaba pynlyngoh ia baroh. Tangba u ong pat ba kadei ruh ka kabu ksiar naka bynta ban pynbha bad pynthymmai lut ia baroh ki rukom treikam ha katei ka tnad.
“Ka long ka jingjia kaba sngewsih ba ka FIFA ka la sospon ia ka phutbol ha India bad ha kajuh ka por nga sngew bakane ka la dei ka rai kaba tyngeh bha ba ka FIFA ka shiim. Hynrei ha kajuh ka por pat nga ngeit ba kadei pat ka kabu ksiar ban ioh pynbeit lut ia ka rukom treikam ha kaba baroh kiba don bynta ha kane ka lympung la ka long naduh ki Federations, State Association, Sports Ministry kin wan lang ban pynbeit ia kane baroh na kabynta ban kyntiew ia ka phutbol ha India/”
