Shillong, Nailar 19 : Ka Khun Hynniewtrep National Awakening Movement (KHNAM) kala shong kyllain mungor hynne ka sngi Nyngkong ha madan Malki ban pynbor ia ka Sorkar Jylla ba kan pynduh noh ia ka personal interview ha ka thungkam sorkar jong ka Group-B, C bad D.
Ki Nongialam bad nongkitkam ka KHNAM kila sdang ia kane ka jingiashong kyllain mungor naduh ka por10 baje mynstep bad yn pynkut ia ka ha ka por 5 baje janmiet mynta hi ka sngi.
Haba kren sha ki lad pathai khubor, u Working President ka KHNAM Bah Thomas Passah ula ong “Kumba ngi la pynbna kane ka jingiakhih kadei ban dawa naka Sorkar Jylla ban pynduh noh iaka Personal Interview haki kam Sorkar Grade B, C, D”.
U Bah Thomas ula kam baka jingpynduh iaka Personal Interview kan pynthikna baka thungkam thungjam hapoh ka Jylla kan long kaba khuid ba suba khlem kano kano ka jingleh shilliang ne jied bahaiing ne ki briew kiba don jingiadei bad ki heh ki hain.
U Bah Thomas ula ong ba kane kam dei shuh ka sien ba nyngkong baka KHNAM ka iakhih ban pynduh iaka Personal Interview hynrei naka liang ka Sorkar Jylla kam shym la sngap bad kane ka pyni baka Sorkar ka lah ban donkti ban thungkam tang iaki ba mon.
“Naduh ka Sorkar MDA, ka KHNAM kala thoh bun tylli ki dorkhas ban dawa pynduh noh iaka Personal Interview hynrei haduh mynta ka Sorkar Jylla kam pat shim ia kano kano la rai halor kane” ula ong.
