Guwahati, Nailar 17: Ki pulit ka Assam kila pynbna ba kin ai khusnam da ka song pisa kaba T.5 Lak ia kiba ai iaki jingtip kiba paka ha kaba iadei bad ka jingtohkit ka jongki halor ka jingbuh bomb da ka ULFA-I.
Ki pulit kila sdang ia ka pynlong ia ka jingwad ha kylleng ki jaka, hadien ba ka kynhun kieng atiar kala byrngem lyngba ka kyrwoh khubor ba kala dep ban buh ia ki bomb ha ki katto katne ki jaka kiba don hapoh ka jylla.
“Ngi kyrpad ia ki paidbah ba kin ai ia ki jingtip ha kaba iadei bad katei ka jingtohkit ia ki kynja bomb kiba la buh da ka ULFA. Ki jingtip kiba paka ha kaba iadei bad ki briew kiba donkti ha kaban shna, ban pynkit bad ban buh ia kitei ki tiar pynbthei” la pynpaw ka Assam Police.
Nalor kane, kila pynpaw ruh “Ba ia ki briew kiba ai iaki jingtip yn ym pyntip briew iano iano ruh shaphang ka jongki”.
Lah ban phah ia ki jingtip ha ka WhatsApp Message: +91 91 326 997 35.
ne DM/Inbox ha ki rynsan Social Media ki jong ngi:
* Facebook: www.facebook.com/police.assam
* X(Twitter): www.x.com/assampolice
* Instagram: www.instagram.com/assampolice
Haba iakren bad ki nongthoh khubor, u Police Commissioner ka Guwahati u Diganta Borah ula pynthikna ba la ioh kurup ia ki tiar ki tar kiba iasyriem bad ki IED ha artylli ki jaka hapoh ka nongbah.
“Ngi lah lap ïa ki circuit, ki tiar pynbthei bad kiwei kiwei ki bynta, hynrei kiwei pat ki lad pynbthei kiba kongsan kim shym la don,” ula ong.
U Borah ula ong, “Ngi lah ioh pdiang ia ki jingtip kiba paka na ka tnad syntiat halor ki 8 tylli ki jaka kiba don hapoh ka nongbah. Ka kynhun ka jong ngi kala pynlong ia ka jingwad bniah kaba jur ha baroh kitei ki 8 tylli ki jaka bad kila dep ban pynlong ia ka jingwad bniah ha ki 6 tylli ki jaka bad na ki ar tylli ki jaka kiba kynthup ia ka Panbazar bad Gandhi Basti la lap ia ki kynja tiar kiba la suba jur bha”.
Kumba ju long man la ka snem, mynta u snem ruh ka ULFA-I kam shym la treh ban iashimbynta lang ha ka jingrakhe ia ka Independence Day.
Ki bor pahara bad ki kynhun jong ka Bomb Squad kila trei ia la ka kam hadien ba kala don ka jingbyrngem buh bomb ka ULFA-I.
