Shillong, Aug 17: U Nongshna phlim na ka rilum Garo u Dominic Sangma ula wanrah nam bad burom da kaba ioh ia ka khusnam Best Director Critic Choice Award na ka bynta ka phlim ka jongu kaba la ai kyrteng Rapture (Rimdogittanga) ha ka Indian Film Festival Melbourne, Australia.
Ia kane ka Festival la pynlong naduh ka 15 tarik u Nailar haduh ka 25 tarik u Nailar, 2024.
Une u nongshna phlim Garo ula jop da kaba iakhun pyrshah ia ki nongshna phlim kiba pawnam kum Kiran Rao ia ka phlim Lapata Ladies, Hemant Rao bad Diwa Shah ia ka Bahadur.
Ka phlim “Rapture” kala pynshohbiej ia ki nongpeitkai ha kaba la pyni ia ka jingïaid lynti ha ki bynta jong ki lum Garo jong ka Meghalaya, kaba don ruh iaka jingïadei kaba jylliew hapdeng ka jinglong ba sngewrit bad ka jingshah shitom hapoh ka shnong kaba don ha nongkyndong.
Ia ka phlim ‘Rapture’ dang pyni mynta ha Tura ha ka Auditorium jong ka District Tura bad yn pyni ia ka haduh ka 25 tarik u Nailar.
Ka Rapture, kabadei ka phlim ha ka ktien Garo, ka iathuhkhana shaphang uwei u khynnah shynrang uba dang 10 snem ka rta uba ialeh pyrshah ia ka jingpang Night Blindness ne ka jingbym lah ban iohi haka por miet bad ula mad ia ka jingeh kaba khraw namar ka jingshyrkhei jong ki kam rahbor iaki khynnah. Kane ka phlim ka ngam jylliew ruh ha kaba iadei bad ka kolshor bad ka rukom ngeit ki jaidbynriew Garo.
Ia kane ka phlim la pyni nyngkong eh ha u bnai Lber 2024 ha ki 100 tylli ki jaka pyni phlim kiba don ha kylleng ka ri France.
Ka phlim jong u Dominic Sangma kaba la tip kum ka ‘MA.AMA’ kala long ka phlim Garo ba nyngkong eh ban ioh ia ka National Award. Katei ka phlim kala ioh ia ka khusnam Best Cinematography Award ha ka 22nd Shanghai International Film Festival ha u snem 2019 bad kala ioh ruh ia ka khusnam Best Film ha ka 14th International Film Festival ha Thrissur.
Ka ‘Rapture’ kadei ka phlim ka baar ka jong u Dominic Sangma bad kala kylla long ka jingjop kaba khraw ha ki rynsan Film Festival. La pyni pyrthei iaka ha ka Locarno Film Festival, kala jop iaka khusnam Best Cultural Diversity ha ka Asian Pacific Screen Awards ha Brisbane, Australia, kala ioh ia ka NETPAC Award ha MAMI, Mumbai, kala ioh ruh ia ka ‘Honorable Mention Award’ ha ka Indian Film Festival ha Los Angeles.
U Sangma ula don ha ka kynhun bishar na ka bynta ka Indian Panorama, ka IFFI, bad ka Guwahati International Short Film and Documentary Film Festival bad ula don ruh ha ka Preview Committee jong ka International Film Festival of India bad ula shah jied ruh na ka bynta ka Berlinale Talents 2020.
 ha ka Indian Film Festival Melbourne, Australia.){kind=link}