Shillong, Jymmang 31: Ka Jylla Meghalaya kala sakhi ia ka jingmih ki University shimet ba kum ki tit hapdeng u snem 2003-2008 kynthup ruh ki University ba treikam be-ain kiba la shah khang tala hynrei mynta sa kawei ka Institute la suba ba ka treikam be-ain ha Jylla khlem da ioh ia ki jingbit ba donkam ne ithuh da ka Ain.
Kane ka Institute ka dei ka Indian Institute of Public Health (IIPH), Shillong kaba la seng da ka Public Health Foundation of India (PHFI), kaba treikam mynta shipor na ka Campus barim jong ka National Institute of Fashion Technology (NIFT) Shillong kaba don ha Pastuer Hills, Shillong.
Kane ka Institute kala pyniaid ia ka Degree Course Master of Public Health(MPH) ba 2 snem ka jingpule kaba la iaid haduh lai tylli ki batch haduh mynta bad kane ka Institute kala ai ruh ia ki master degree sha ki samla pule kiba la pyndep ia ka jingpule.
Hynrei lyngngoh ban tip ba kane ka Institute watla kala pyniaid ia ki degree course naduh u snem 2019, kam pat dei satia ka Institute kaba la pynbna ialade kum ka College/ University lane la ioh jingbit ne jingithuh ia ki kyrdan pule na ka Sorkar Jylla khlem da iakren ia ka jingdonkam ban don iala ka Jong ka Ain kaba la mynjur da ka Iingdorbar Thawain ka Jylla kumba long kiwei ki University Shimet.
Ka PHFI kala iasoi ia ka Memorandum of Understanding bad ka Sorkar Meghalaya ha u snem 2008 ha ka jingdon ryngkat u Dr. Donkupar Roy (Bam Kwai Ha Dwar U Blei) kum u Myntri Rangbah ka Jylla.
“Ka IIPH kam pat dei satia ka jaka pule ne college/University.Kam pat pynbna ialade kum ka college ne University bad kam lah satia ban pyniaid ia ki degree course” ong u Additional Chief Secretary ka Jylla ba khmih ia ka Tnad Pule Puthi ka Jylla Bah D.P Wahlang haba iakren bad u Nongthoh khubor.
Kat kum ka Meghalaya private university (Regulation of Establishment and Maintenance of Standards) Act, 2012 bad 2019, la ong ba ki Private University ki dei ban seng da ka la ka jong ka ain jong ka Jylla ba kin Seng ia ki jaka pule bad ban pynbiang ia ki jingdonkam baroh kat kumba la pruid dak da ka University Grants Commission (UGC) bad kiwei kiwei ki bor ba dei khmih ia ki programme ba ka pyniaid kum ka Medical Council of India (MCI), ka Indian Nursing Council (INC), the Pharmacy Council of India(PCI) ter ter.
“Lada ka IIPH ka kwah pyniaid ia ki certificate course kum ka BA, MA, BSC, MSC ne kino kino ki Course ki dei ban pyniasoh ialade (affiliated) bad ki University kata ruh hadien ba ki pynbna ialade kum ki college. Hynrei mynno ka IIPH kala pynbna ialade kum ka College…Kam pat pynbna satia haduh mynta” ula ong.
Kat kum ka web portal jong ka Indian Institute of Public Health (IIPH), Shillong, la pyntip ba ki samla pule kiba kwah pule ia ka Master Of Public Health (MPH) Course kin hap ban register kyrteng ialade bad ka Martin Luther Christian University (MLCU) kaba dei kawei pat ka University shimet katba ia ka degree pat yn ai da ka Institurlte (IIPH).
Halor kane, u Additional Chief Secretary ula ong ” Kumno kan lah ban long ba ka Institute Shimet (Private Institute) kan leit pyniasoh ialade bad kawei pat ka University Shimet” bad bynrap ” Ka MLCU ka dei ka Unitary University bad kam lah satia ban buh ia ki off-campus”.
Halor ka jingpyniaid ia ka degree course, ula ong ” Ka IIPH ka dei ban pynbna shuwa ialade kum ka College bad ka hap ban pyniasoh ialade bad ka NEHU bad ioh jingbit ne No Objection Certificate na ka Tnad Puthi Puthi, ka bym pat don satia ba kum kata haduh mynta”.
Halor ka MoU, une u Heh Ophisar ula ong ba kane ka soskular ka dei kaba ailad ka PHFI ban seng ia ka IIPH ha Meghalaya ym ba ai jingbit ban pyniaid ia kyrdan pule kum ka jaka pule.
“Ka PHFI kala dei ban thaw iala ka jong ka Institute bad ka Sorkar Meghalaya kala kyrshan ruh ia kane ka Foundation ba kan pyndep ia kane da kaba ai ei ia ka jaka palat ia ka 20 acre ha Mawdiangdiang. Ha ka jingshisha ka PHFI kala dei ban pynieng ia la ka jong ka Institute hynrei ka khlem leh satia ia kata bad ka Tnad Urban Affairs kala shim noh ia ka jaka” ula iathuh.
Lah ban kdew hangne ba la don ruh ka Bill ( Ain rewards) bala phah da ka PHFI ban don noh la ka jong ka Ain ba la mynjur da ka Iingdobar Thawain ka Jylla hynrei ka Tnad pule Puthi kala pynphai bad pan ruh ia kiba bun ki jingpynshai ki bym pat jubab haduh mynta.
Halor kane, u Additional Chief Secretary ula kubur ba ka la don ka bill (Ain rew) Jong ka IIPH hynrei kane ka bill kam hap satia hapoh ka jingpeit jong ka Tnad Pule Puthi hynrei ka hap hapoh ka Tnad ka Koit ka Khiah.
Kumjuh Ruh u Director ka Higher and Technical Education Ambrose Marak ula pyntip ba ka Tnad Higher and Technical Education kam don jingtip satia ia ka rukom treikam ka IIPH namar kane ka hap hapoh ka Tnad ka Koit ka Khiah.
Haba twad jingmut, u Director ka Health Services (MI) u pyntip ba ka IIPH ka la phah teng ia ka jingthoh sha ka Directorate ban pyniaid ia ka Master course kaba dei ka Master of Public Health bad kumjuh ruh ia ki Research Programme hynrei ka Directorate ka lah kyntait namar ba dang pan ia ka jingpynshai na ka Sorkar halor ka jingithuh ia ka IIPH.
” Ka IIPH Shillong ka la ju khot la bunsien ia nga ban long u kongsan (chief guest) ha ki prokram bapher bapher Jong ka Institute hynrei nga kyntait beit bad ngam ju leit namar ka jinglong artatien ia kane ka Institute ba ka dei kaba la ithuh da ka Ain”.
