Shillong Nailar 08: Ka sorkar Meghalaya kala pynsangeh noh shipor ia ki kam khaii pateng ha ki ‘Border Haat’ ne Iew Khappud kiba don ha shi lynter ka thaiñ khappud bad ka ri Bangladesh namar ka jinglong jingman ka suk ka sain ha katei ka ri, la iathuh ki heh sorkar hynne ka sngi Palei.
Ki Border Security Force (BSF) bad ki pulit jong ka jylla, kila ïasam ïa ki jingtip kaba kila ïoh na ki tnad syntiat ba ka lah ban don ka jingma kaba khraw na ka jingpyrshang ban don ka jingwan rung tuh ki nong Bangladesh, ki kyhun kieng atiar, ki nongkhaïï be-aiñ bad kiwei kiwei ki kam sniew lada plie ia ka Border Haat, la iathuh ki heh ophisar.
Kumba long mynta, ki don ar tylli ki border haat – kawei ha Balat ha East Khasi Hills bad kawei ha Kalaichar kaba don ha South West Garo Hills.
Katto katne kiwei pat ki haat ki dang treikam hynrei kim pat lah ban treikam pura.
Uwei u heh sorkar ula ong “Ka sorkar kala rai ban pynsangeh shipor ïa ki kam khaii ha ki jaka khappud haduh ba ka jinglong jingman ha Bangladesh kan long kaba shngaiñ.” Kane ka rai ka long hadien ka jingai jingmut na ki BSF bad ki pulit jong ka jylla.
Ha ka sngi Nyngkong jong ka taiew, ka sorkar jylla kala pynjari ia ka Korphiw Miet ha shilynter u pud u sam bad ka ri Bangladesh naduh ka por 6 baje mynstep haduh ka por 6 baje mynmiet man ka sngi tad haduh ban da pynbna da kumwei pat.
Ka sorkar jylla kan sa lum ia ka jingialang bad baroh kiba iadonbynta ha ka kam kaba kynthup ia ki BSF bad ki pulit ka jylla, ban iakren ia ka jinglong jingman bad ban weng ia ki jingma kiba lah ban mih na ki kynhun pyrshah ri kiba shimkabu ia ka jinglong jingman, la ong u heh sorkar.
Ki don kumba 22 tylli ki jaka ba la thmu ban buh ia ki Border Haat ha kylleng u pud u sam jong ka Meghalaya bad ka ri Bangladesh uba jrong 443 Km.
