Shillong, Nailar 08 : Ka Meghalaya Public Service Commission (MPSC) kala kular ban pyllait paidbah ia ki marks jong baroh ki nongiakhun ia ka eksam Meghalaya Civil Service (Preliminary) hapoh ka 24 kynta hadein ka jingiakhih jong ka seng Khasi Students’ Union (KSU), kaba dawa ban don ka jingthungkam haba shit haba shai.
Ia kane ka jingkular la khlei da u Chairman ka MPSC ha ka jingialang bad ki Nongialam ka KSU hynne ka janmiet sngi Palei.
Ki mat iakren bala buh jingthoh (minutes) jong kane ka Jingialang bala iasoi da baroh ar kynhun, kala ong ba ka MPSC kala mynjur ban pyllait paidbah ia ki marks jong baroh ki nongiakhun ia ka eksam, kiba la iakhun ia ka MCS (Prelims) Examination hapoh ka 24 kynta.
Ka Commission kala kular ruh ban pynmih ia ka answer key kynthup ia ki answer key kiba bakla bad kiba la pynbeit lem bad ki lai tylli ki jingkylli kiba bakla ha ryngkat ki jubab kiba dei hapoh ka 24 kynta.
Kat kum ki minutes jong ka jingialang, ka KSU kala dawa ruh ba ia ka personal interview jong ka kam Meghalaya Police Service dei ban leh kat kum ka jingpynbna laitkam ba pynmih nyngkong ha u 2019 ha kaba ka ratio ka dei ban long 1:2:5 ym kum ka Office Memorandum ba thymmai kaba la pynkylla sha ka 1:1:5.
“U Chairman ula pan por halor kane khnang ba un ioh iakren ha ka jingialang bad kiwei pat ki dkhot ka Commission” kala ong.
Nalor kane ka minutes kala ong “Ia mynta, ka personal interview bala buh ban long ha ka 20 bad 21 tarik Nailar, 2024, dei ban pynsangeh noh tad haduh da pynbna da kumwei pat. Ki roll nombor ki dei ban long ka juh na ka Prelims tad haduh ka Personal Interview jong ka Meghalaya Civil Service Examination. Ia ka jingpynbna ba 6 tarik Nailar, 2024 dei ban khein iap noh bad ia ki marks dei ban buh ha ki rynsan paidbah”.
 kala kular ban pyllait paidbah ia ki marks jong baroh ki nongiakhun ia ka eksam Meghalaya Civil Service (Preliminary) hapoh ka 24 kynta hadein ka jingiakhih jong ka seng Khasi Students’ Union (KSU), kaba dawa ban don ka jingthungkam haba shit haba shai.){kind=link}