Shillong, Nailar 14: U President ka BJP Bah Ernest Mawrie ula pynpaw ia ka jingbym don jingtip eiei ia ka jingthmu jong u MLA ba shah sospon ka Congress na West Shillong Bah Mohendro Rapsang ban wan pyniasoh sha ka BJP bad ban mih aireng na kane ka party ha ka elekshon MLA 2023.
U bah Ernest ula kren ia kane halor ka jingpynmih khubor jong u National Executive Member bad Myntri barim ka Sorkar Bah A.L.Hek ba ong ba u Bah Rapsang un dei uwei na ki MLA ba mynta uba la pynpaw ia ka jingkwah ban wan iasoh noh sha ka BJP.
“Ka dei tang ka jingkren u Bah Hek namar u Bah Rapsang um pat wan iakren bad ngi khamtam ka Party ne nga kum u President ngim pat iakynduh satia ia u” ong u Bah Mawrie.
Une u Nongialam ka BJP ula kren shai ruh ba kino kino kiba kwah ia ka ticket jong ka Party kin hap ban iaid ia bun ki lynti kum ka jingrung dkhot bad ruh ban long ki nongtrei ba shitrhem jong ka Party ba kin long kiba bit ban ioh ticket.
U Bah Ernest ula ai nuksa ia ka elekshon ba dang shu dep ha Assam ba bun ki MLA kila shah pynduh ticket namar kane ka nongrim treikam ka party.
Kane ka jingkren u Bah Hek kala mih wat hapdeng ka jingtip ba u Bah Ernest dalade ula pynkhreh ban iakhun ia ka elekshon MLA 2023 na West Shillong Constituency.
U Bah Ernest ula pynpaw ruh ia ka jingsngewbynniaw halor ka jingwan rung dkhot jong ki briew na Mawsynram kiba dei ki Nongkyrshan jong u MLA ka AITC Bah Himalaya Shangpliang bad ong ba kane ka jingpynrung dkhot ka dei kaba la shu leh kyrkieh.
“Ngam don eiei pyshah ia ki hynrei tang kawei ka long ba ngi hangne ngi don ha ka rukom treikam. Ngi pdiang beit iano iano ruh ban wan pyniasoh hynrei namar ngi la don lypa ia ka Mandal ha Mawsynram-ki dei ban pyntip sha ki ruh” ula ong haba bynrap “Ngi pdiang iano iano ruh ym tang ia ki Nongkyrshan u Bah Himalaya ne ki nongkyrshan jong no jong no ruh naba nga ju ong b aka jingkhang jong ka party ka plie ia baroh ban wan iasoh” ula ong.
Ha kawei pat ka liang, u bah Ernest ula ong ba ka jingwan rung jong kino kino ki VIP lane mano mano ruh ka dei kaba hap ban iaid lyngba u President.
“Kane ka dei ka lynti ba ngi ju bud. Ngi kum ka National Party bad ha kano kano ka Jylla ki President ka Party kin hap ban pyntip ia kiei kiei kiei baroh sha ki Nongialam bad ym don satia ki dkhot kum ki MLA kiba don iala ka bynta ban leh. Ngi don u President bad u President un rai bad u dei ma u uba hap ban pdiang ia ki briew bad pynrung dkhot ia ki kat kum ka lynti” ula ong.
Ha kajuh ka por, u Bah Ernest ula ong ba shen ka BJP kan sa khot ia ki arngut ki MLA Bah A.L.Hek bad u MLA ka South Shillong Bah Sanbor Shullai ban iapynbeit ia ki jingiapher jingmut hapdeng jong ki.
“Haduh mynta hi kane ka kam ka dang sahteng. Ki Nongialam na Delhi kila bthah ba hadien ka jingrakhe laitluid, ngin sa shong ia ka jingialang jong ka State Executive Committee bad shuwa kane ngin sa khot ia kine ki MLA ban pynbeit ia ka kam jong ki” ula ong.
U bah Ernest u pyntip ba ka jingialang jong ki Nongkitkam ka BJP ha Jylla dang shen kila rai ban khot ia kine ki MLA hynrei ym shym la lah ban pynlong ia ka jignialang namar ka jingleit London u Bah Hek katba u Bah Sanbor pat u don hapdeng ka jingsumar ha Hospital.
“Hynrei ngin sa iashonglang bad iapynbeit ia kane ka jingiapher jingmut jong kine ki MLA” ula ong.
