Nongstoiñ, Nailar14: Ka Congress Party kala pynkhreh mynta ban sei kyrtong ha Rambrai-Jyrngam Constituency, u ban iakhun pyrshah ia u MLA ba shah sospon na ka party Bah Kimfa S Marbaniang ha ka elekshon MLA 2023.
U bah Bormanding Nonglang District President ka West Khasi Hills District Congress Committee haba ïakren bad u nongthoh khubor, u la ong ba ka Congress ka la don lypa ïa u kyrtong ha katei Constituency bad ka jing pynkhreh ruh ka la nang ïaid shait shait.
Haba kylli ia ka jinglong jingman jong ka saiñ pyrthei ha ka Rambrai Jyrngam Constituency, u bah Nonglang u la ong ba ki nongmihkhmat jong katei ka Constituency ki la shet kylla ym tang ïa ka party, hynrei ki la shet kylla ruh ïa ki nongkyrshan kiba la pynjop don burom ïa ki.
U la ong ba ba naduh ba u bah Kimfa S. Marbañiang u la jop ïa ka Election MLA ha u snem 2018, ka party ka don ka jingkyrmen ba ha u snem 2023 ruh un dang jop.
“Hynrei khlem poi pyrkhat ei ei khamakha u la shah ialam bakla, tangba wat la katta ruh ki nongkyrshan jong ka Congress kin ym kylla da lei lei hynrei kin ïaineh beit kumba ki long” ula ong.
U bah Nonglang u la ong ruh ba wat la ka Congress kam don shuh ki MLA barim kiba la kham tbit bad kham shem phang ha ka rukom trei kam, hynrei ka don ka jingkyrmen ba ki kyrtong kiba thymmai kin jop bad kin long ruh kiba kham shem phang, namar baroh ki kyrtong kiba thymmai ki dei kiba la bit la biang ha ka kyrdan pule.
Haba ïakren bad u Bah P.Thongni Vice President ka party Congress ha West Khasi Hills, u la ong ba wat lada ka NPP kan ai tiket ïa u bah Kimfa S.Marbañiang ba un ïakhun kum u MLA ha u 2023, kan ym don jingmut satia ba kin dang kyrshan ïa u, namar um don jingïapher ei ei na u nongïalehkai phutbol u ba shah sei red card ha madan.
Shuh shuh, u la ong ruh ba ka party ka la ïoh jingtip ruh ba ki don ki nongïalam jong ka party kiba la mih noh ba kynthup ïa u Working President bad kiwei kiwei ki nongïalam ba hakhmat, kiba la leit bud noh ïa u bah Bajop Pyngrope sha ka NPP.
Ki don ruh ki nongïalam na ki shnong bapher bapher kiba la mih noh na ka party bad kiba la leit rung noh sha kiwei pat ki party. Ym lah ban len ba ka jingmih noh jong ki na ka party, kan don hi ka jingktah ha ka election 2023.
Watla katta ruh u la ong ba ka party kam duh jingkyrmen bad ka pyrshang katba lah ban trei shitom na ka bynta ban pynjop biang ha ka election ban wan.
