Shillong, Nailar 14: Ka skul OM Roy Memorial Secondary School, St Anthonys LP School bad ka Shillong College kila ioh rah ia ka nam lahduh ha ka lympung ialehkai karate jong ka Inter School ba 28 bad Inter College ba 10, kaba kut hynnin ka sngi saitjain.
Kane ka lympung ialehkai ba lai sngi kala long ha Laban SC Indoor Stadium bad la pyniaid ia ka da ka All Meghalaya Karate-do Association. Kumba 300 ngut ki nongialehkai karate na ki 45 tylli bad 6 tylli ki skul kila iashimbynta.
Ha ka jingialehkai ki Kynthei, ka kynhun ialehkai ka OM Roy kala jop da 4 tylli ki takma ksiar, lai tylli ki rupa bad lai tylli ki rynnong katba ka Kiddies Corner Secondary School kala wan ba-ar da lai tylli ki takma ksiar bad lai tylli ki takma rynnong.
Ha ka jingialehkai ki shynrang, ka kynhun ialehkai ka St Anthony’s LP school kala ioh rah ia ka nam lahduh da ka jingioh khubor haduh saw tylli ki takma ksiar, artylli ki rupa bad phra tylli ki rynnong bud s aka Providence School kaba wan baar da saw tylli ki takma ksiar bad saw tylli ki tynnong.
Ha ka jingiakhun ki College, ka Shillong College kala wan ba nyngkong da ka jingioh khur haduh lai tylli ki takma ksiar, lai tylli ki rupa bad hynniew tylli ki rynnong katba ka St Edmunds kala wan baar da lai tylli ki takma ksiar bad kawei ka rupa.
Ia kane ka lympung ialehkai la plie da u President ka Mawkhar SC Bah Ransom Sutnga ha ka jingiadonlang u General Secretary ka Meghalaya State Olympic Association Bah Finely L Pariat.
Ia kane ka lympung la pynhap pyrda da u Working President ka MSOA Bah John F Kharshiing ha ka jingiadon ryngkat u Dkhot ka Executive Council ka MSOA Bah Dipshon Ryntathiang.
Ha kane ka sngi la sam ruh ia ka khusnam Best Karateka ha ka kyrdan bapher bapher ba kynthup ia ka Boys Senior – Cheltis Shylla (Providence School), Boys Junior – Eric B Ryngnga (St Anthony’s LP School), Girls Senior – Rebeka Nongspung (Providence School) bad Girls Junior – Emika D Myrthong (BK Bajoria School).
