Ba shah kynnoh die duh ia ki jaka khappud sha ka Assam
Nongpoh, Nailar 07 : U Syiem ka Raid Marwet Bah Ken Syiem, ula byrngem ban mudui da ka mukotduma bai mynrain khmat pyrshah ia uwei u bar jylla na Shillong, namar ka jingkynnoh ba u die duh ia ki jaka puta ha khappud sha ki bar jylla ba na Assam.
Une u bar jylla u dei uba tip kyrteng u Uma Shankar Mishra uba sah ha Mawpat, Shillong. U Uma u dei u briew uba kam trai ia kawei ka jaka ha ka shnong Barapathar- kaba la mih huri hura hadien ka jingkam trai sa uwei u bar jylla na Assam uba la kam ba ula thied ia kane ka jaka haduh T.10 lak na uwei u Muslim ba kyrteng u Nurul Islam.
Haba iakren bad ki lad pathai khubor, u Bah Ken Syiem ula ong ba ki jingkynnoh jong u Uma Shankar Mishra ki dei ki bym don nongrim satia bad bynrap “Ngan mudui da ka mukotduma ban dawa bai mynrain khmat na une u bar Jylla ba u kynnoh ia u Syiem ka Raid Marwet ba u dei u Dalal ne u nongdie ia ki shnong khappud”.
Haba batai halor ka jingiakajia thied jaka ha Barapathar, u Syiem ka Raid Marwet ula ong ba u Uma Shankar Mishra ula shu kam trai ia kane ka jaka ba don haduh 500 acre kaba kynthup naduh Khanapara sha Barapathar bad ruh ia kawei ka karkhana tylliat maw jong ki briew kiba dei na ka jait Shylla.
“Une u briew u dei u riewthok riew shukor bad ki kot ki sla bad ki muhor haki kot ki sla, ki dei kiba la shah thok” ula kynnoh bad bynrap “Haduh mynta kam pat don satia kano kano ka kot ka sla khyndew jong u Uma Shankar Mishra hapoh ka Ophis u Syiem ka Raid Marwet”.
U Bah Ken ula kyntu ia ki paidbah ba kim dei ban ngeit ia kaei kaba kynnoh u Uma Shankar Mishra namar ba ka dei tang ka jingkynnoh ban pynthohbria ia u Syiem ka Raid.
