Shillong, Nailar 07 : Ka Shillong Municipal Board (SMB) ha ryngkat ka tnad ka koit ka khiah mynnin ka sngi ka la pynlong ia ka Enrolment camp kaba ar sngi, ban pynrung kyrteng ia ki nongtrei ba lum ba lang ia ki jaboh hapoh ka Meghalaya Health Insurance Scheme (MHIS) bad ka Pradhan Mantri Jan Arogya Jana (PMJAY).
Kane ka Enrolment Camp kaba la pynlong ha Shillong Municipal Board Office Compound, bad ha Marten Waste Processing and Disposal Site, Mawlai, ka thmu ban ai jingïada na ka koit ka khiah ïa ki nongtrei kam pynïaid jaboh, ban pynthikna ïa ka jingbit jingbiang bad ka jingshngaiñ ha ka liang ka pisa tyngka jong ki. La pynrung kyrteng ia 330 ngut ha katei ka camp kaba ar sngi.
Ha kane ka Camp bala pynlong ha ka campus jong ka ophis ka SMB la pynrung kyrteng ia ki nongtrei ha ka ABHA Card bad ban pyniasoh ia ka MHIS da ka adhaar card haduh 212 ngut katba ha Marten site ha Mawlai la pynrung kyrteng ia ki 118 ngut.
Ki nongtrei kiba la pynrung kyrteng ki kynthup ïa ki nongjied ïa ki jaboh, ki nongdie ïa ki jaboh, ki nongñiah kali, ki nongniah trok, bad ki nongtrei na ka jaka pynkhuid jaboh jabaiñ (CBMTC), ka jaka bret jaboh bad ka jaka pynkhuid jaboh jabaiñ (FSTP).
Ka camp ka pynpaw ia ka jingkular jong ka sorkar jylla ban pynlong ia ki jingshakri ha ka koit ka khiah kiba lah ban ioh da uwei pa uwei u nongshong shnong. Ki nongtrei jong ka Shillong Municipal Board (SMB) bad ki ophisar na ka tnat ka Koit ka Khiah ki la ïa don lang ban pynthikna ba la ai jingbthah kaba paka sha ki nongwan pynrung kyrteng ha kaba ïadei bad ka jingpyndonkam ïa ka skhim MHIS bad PMJAY.
Ka Ayushman Bharat Yojana, kaba la tip ruh kum ka Pradhan Mantri Jan Arogya Yojana (PMJAY) ka dei ka skhim ai jingsumar kaba la sdang da ka sorkar India ha u snem 2018.
Ha ka jylla Meghalaya, ka jingkhein kyllum ia kiba la pynrung kyrteng hapoh ka MHIS Phase V ka long kumba 72.11%, ha kaba la pynshisha baroh ki long 1,835,631 ngut bad baroh ki longiing kiba la pynshisha ki long 496,497 tylli.
