Agartala, Nailar 06: U Myntri Rangbah ka Tripura Manik Saha ha ka sngi Ba-ar, ula pyntip ba ka Jylla kala khang dam ia ka rung ka mih ha khappud bad ka Bangladesh namar ka jingiai bteng ki kam umsnam bad jingkynad ha kane ka Ri ba markhap.
U Saha ula ong ba ka jingrung sha India lyngba ki jaka khappud ka Tripura ruh la khang syndon mynta.
Haba iakren bad ki nongthoh khubor, ula ong baka jinglong jingman ha khappud ka Tripura bad Bangladesh ka dei kaba la peit pyrman bha. Ula ong ba ula iakren khlem sangeh bad ki bor ka Sorkar Pdeng bad ula bud ia ki jingbthah jong ki nalor ka jingai ia ki jingtip na u Chief Secretary, DGP, Assam Rifles bad BSF
Ula ban jur ba ka jinglong jingman ka suk ka sain ha Tripura ka dang long kaba jai jai.
Ula pyntip ba ha ka sngi Nyngkong, ula shong bishar kam halor ka jinglong jingman ha Bangladesh bad ioh jingtip ba bun ki briew ha Bangladesh kila iarap ia ki paid Hindu ba kin im shngain.
Ka jinglong jingman ha Bangladesh ka don jingktah bha ia ka Tripura naba kiba bun ki nongshongshnong ki dei kiba wan rung kum ki phetwir ha ka thma laitluid ka Bangladesh ha u snem 1971. Kala ai jaka rieh ia kumba 16 lak ki phetwir kaba long palat ia ka 15 lak ki trai shnong, kaba pynlong ruh ia ki paid riewlum ha ka Jylla ban kylla rit paid.
