Shillong Nailar 14:U Symbud Myntri Rangbah ka jylla ba khmih iaka tnad Bording Bah Prestone Tynsong u la pyntip ba ka sorkar kan sa thied thymmai noh 300 tylli ki Transformer khnang ba lada don ka jingbthei jong u Transformer yn ioh ban bujli mardor ban pynpoi iaka bording elektrik sha ki iing ki sem bad sha ki shnong ki thaw.
U Bah Prestone u la kren ia katei hadien ba bun ki shnong ki thaw kiba don ha kylleng ki jaka, kila mad jingeh namar ka jingbym ioh thikna ia ka bording elektrik ha kine ki sngi.
“Ka jingthud jong ka bording elektrik kadei namar ka jingduh jong ki Transformer bad kane ka jia ha kylleng ki jaka bad ki don ki khep ba don ruh ka jingmaramot bad ban bujli iaki Electric Post bad ka lah ban shim por haduh 4 kynta ne haduh 6 kynta” ong u Bah Prestone Tynsong.
“Ka sorkar kan thied thymmai noh 300 tylli ki Transformer bad yn buh lypa ia ki, khnang ba lada jia ba bthei u Transformer yn ioh ban bujli noh mardor da uba thymmai” ula ong.
Haba kylli, ula pyntip ba ia ki Transformer kiba sniew pat yn phah maramot biang bad yn buh biang ha ka ‘Stock’, khnang ba ki shnong ki thaw kin ym mad jingeh shuh nangne shakhmat.
“Baroh shikatta ngim ju buh lypa ia ki Transformer ha ka stock bad haba don ka jingsniew jong kine ki kor, da une u juh ngi ju rah ban phah shna kaba bam por shibnai ne arbnai tam. Kane ka dei ka daw ba bun ki shnong ki hap shongdum haba duh ki transformer” ula ong.
U Symbud Myntri Rangbah ula pyntip ba mynta ka Tnad Bording kan thied lypa noh ia ki Transformer thymmai ban pynduna iaka jingduh iaka bording elektrik bad ban pynthikna ba ki paidbah kin ioh thikna iaka bording bad kan ym ktah ruh ia ki khynnah bad ki samla kiba don hapdeng ki jingpule.
