Guwahati, Nailar 05: Ka Assam Jatiya Parishad (AJP) kaba dei ka seng riewlum bad kaba iatreilang bad ka Liang Pyrshah ba ialam da ka Congress, kala kyntu ia ka sorkar pdeng ba kan bishar biang ia ki lad jingiada ha khappud Indo-Bangladesh khamtam haba iadei bad ka jingjia ba dang shen ha Bangladesh, ha kaba ka Myntri Rangbah duh ka Sheikh Hasina kala iehnoh kam bad kala wan phet noh sha ri India hadien ka jingkhihwin jong u paidbah.
U President ka AJP u Lurinjyoti Gogoi bad u General Secretary u Jagdish Bhuyan kila pynpaw ia ka jingsngewkhia halor ka jinglah ban kiew ka jingwan buhai shnong ki briew kiba na Bangladesh sha India namar ka jingkulmar.
Ka AJP kala pynpaw ia ka jingdonkam ban pynkhlain ia ka jingpahara, khamtam ha ki jaka khappud kiba don marjan bad ka Assam. Kane ka seng riewlum kala maham ba ki seng kiba ialeh pyrshah ia ka ri India kiba donkti ha ka jingpynkhihwin dang shen ha Bangladesh ki don ia ka histori ba ki don iaka jingiadei bad ki lehnoh ha West Bengal bad ha Assam.
“Nalor kata, ki nongshong shnong ka Bangladesh kiba lah ban ïoh mynsiem na ka jingpyntreikam ïa ka Citizenship Amendment Act (CAA) ha India ruh, ki lah ban leit sha Assam, kaban pynsniew shuh shuh ïa ka jinglong jingman”, kila ong.
Ka seng riewlum kala kynthoh ruh ia ka sorkar BJP halor ka jingbym lah ban khang sbak ia u pud u sam ka Assam-Bangladesh da kaba ker da ki sainar shiah bad ban ithuh bad beh ia ki bar ri katkum ka Assam Accord. Kala kdew ruh ïa ka jingbym biang ka jingpynthymmai ïa ka National Register of Citizens (NRC) bad ka jingpyntreikam ïa ka CAA kum ki daw kiba la plie lad ïa ka jingkiew ka jingwan buhai shnong ha ka jylla Assam.
Ka AJP kala kyntu ia u Myntri Rangbah ka Assam ban leh kyrkieh bad kala kyntu ia u ban iakynduh ia ka tnad kam poh iing bad ka tnad iada ri jong ka sorkar pdeng ban weng ia kine ki jingeh ha ka liang ka jingshngain bad ban iada na ka jingwan rung tuh jong ki nong Bangladesh, ki lehnoh, lane ki nongwan buhai shnong ba la plie lad lyngba ka CAA.
 kaba dei ka seng riewlum bad kaba iatreilang bad ka Liang Pyrshah ba ialam da ka Congress, kala kyntu ia ka sorkar pdeng ba kan bishar biang ia ki lad jingiada ha khappud Indo-Bangladesh khamtam haba iadei bad ka jingjia ba dang shen ha Bangladesh, ha kaba ka Myntri Rangbah duh ka Sheikh Hasina kala iehnoh kam bad kala wan phet noh sha ri India hadien ka jingkhihwin jong u paidbah.){kind=link}