Khur 2 tylli ki takma ksiar na ka National Arm Wrestling
Shillong, Nailar 05: Ka Samla Airikmenlang Shabong kala shah jied ban mihkhmat ia ka Ri India sha ka World Arm Wrestling and Para Arm Wrestling Championship, 2024, ka ban long ha Moldova mynta u bnai.
Kane ka lympung ialehkai kan sdang naduh ka 15 tarik Nailar haduh ka 25 tarik Nailar, 2024. Kane ka samla kala shah jied ban ialehkai ha ka kyrdan U-50 Kg Youth bad ka Senior Category.
Kane ka jingshah jied ban mihkhmat ia ka Ri India, kala wan hadien ba kane ka samla kala ioh khur haduh 2 tylli ki takma ksiar, kawei ka takma rupa bad kawei ka takma rynnong ha ka National Arm Wrestling Championship ba dang shu kut ha Nagpur, Maharashtra.
Ka samla Airikmenlang kala ioh khur ia ki takma ksiar ha ka Right hand Youth bad Senior Category, ka takma rupa ha ka left hand Youth bad ka takma rynnong ha ka left hand category.
