Kynnoh dei u Nongbud ba jan eh u MP ka Lok Sabha
Shillong, Nailar 04 : U Nongialam ka BJP bad MDC ka Tura Bernard N Marak, ula ujor da ka ejahar pyrshah ia u Contractor halor ka jingkynnoh ba ula shukor ia ki nongshongshnong bad ai ia ka kaiphod thok sha ka Sorkar Pdeng ha ka jingpyntreikam ia ka project Jal Jeevan Mission (JJM) hapoh ka Shnong Jebalgre.
U Bernard ha ka ejahar bala mudui ha u SP ka West Garo Hills ula ong “U Aiok M Sangma, uba dei u nongbud ba iajan bha jong u MLA barim ka Gambegre (MP-Lok Sabha) Saleng A Sangma, ula ioh ban pyntrei ia ka project JJM, uba khlem da pyntrei ia ka kam, ula aiti ia ka kaiphod ba ula pyndep haduh 60% ka kam katba ki shnong kiba hap ha kane ka project ba kynthup ia ka Jebalgre, Dikkimpara, Dopogre, Dasogre,kim pat ioh um satia”.
Ula ong ba ki nongshongshnong kim pat ioh kor um satia ha Iing bad ka jingioh umbam umdih ka dang dei ka jingphohsniew ba sha jngai bah. Ula kynnoh “U Congtractor u khlem trei ia ka kam bad shu kam ba ka Jebalgre kala dep 100% ka jingpyniasoh ia ki pipe um katba ka jingshisha pat ka long ba ym pat don eiei”.
Ula kynnoh ruh “U Aiok M Sangma ula kyntait ban shim ia ka phone call jong ka Tnad PHE ba un pynsted ia ka kam bad ban pyndep ia ka kam hapoh ka por bala buh”.
“Namar kata, ngi kyrpad ia phi ban register mardor ia ka jingujor khnang ba kum kine ki kam kin ym jia shuh hadien habud. Kaba sniew eh ka long ba ula phah ia ka kaiphod ba shu thok sha ka Sorkar Pdeng da kaba ong ba ka Jabalgre kala ioh kor um iing haduh 100%” ula ong.
