Shillong, Nailar 04 : Ka samla Bahun Nongrum kala ioh ban kup ia ka painsngiat Miss Meghalaya 2024 bad ka samla Mika Dkhar kala ioh ia ka Miss Teen Meghalaya.
Kane ka jingiakop Miss Meghalaya bad Miss Teen Meghalaya, ka dei kaba long ha ka janmiet sngi Saitjain ha Lariti Auditorium, Shillong.
Napdeng ki 22 ngut ki thei bhabriew na kylleng ka Jylla kiba iashimbynta ha ka jingiakop, ka samla Bahun ia ka khur ia ka nam lahduh. Kala pyniapbiej ia ki nongbishar bad nongpeitkai da ka jingbhabriew, jingstad, ka jingdait rem bad ka jubab kaba shoh bha halor ki kam jngohkai ha Meghalaya.
Ia ka nam First Runners-Up la ioh rah da ka samal Chaivalry Tariang bad ia ka Second Runners-Up la ioh rah da ka samla Lily Kharthangmaw.
Ha kajuh ka por, ka samla Mika Dkhar, kala ioh kup ia ka painsngiat Miss Teen Meghalaya 2024 napdeng ki 19 ngut ki samla ba iashimbynta ha ka jingiakop.
Ka samla Palei Mynsiem Chyne kala ioh rah ia ka nam First Runners-Up katba ka samla Nikita Nongrum kala ioh rah ia ka nam Second Runners-Up.
Ka Miss Meghalaya kala ioh rah ruh ia ka khusnam song pisa ba T. 1 lak bad ka Miss Teen kala ioh rah sha Iing ha ia song pisa ba T.25,000.
Nalor kine, kila don kiwei ruh ki samla kiba ioh ia ki khusnam subtitle kum ka Miss Personality, Miss Congeniality, Miss Catwalk bad Miss Beautiful Smile bad kiwei kiwei.
Ka samla Bahun kaba jop ia ka Miss Meghalaya kala ioh mihkhmat ia ka Meghalaya ban iakhun ia ka Miss Universe India 2024 katba ka First Runners-Up kan mihkhmat ia ka Meghalaya sha ka Miss Northeast 2024.
